ఒలింపిక్ పతకం కోసమే కొంచెం బాధ: సానియా మీర్జా; భారత మహిళా టెన్నిస్ భవిష్యత్తుపై కీలక ప్రకటన

2023లో ప్రొఫెషనల్ టెన్నిస్‌కు వీడ్కోలు పలికిన భారత టెన్నిస్ స్టార్ సానియా మీర్జా, తన కెరీర్‌లో ఒకే ఒక విచారం ఉందని తాజా ఇంటర్వ్యూలో వెల్లడించారు. 'ఒలింపిక్ పతకం నా దగ్గర లేదు. అదొక్కటే కాస్త బాధగా మిగిలిపోయింది. కానీ, మరో ఒలింపిక్స్‌లో అత్యున్నత స్థాయిలో ఆడగలనని నాకు నమ్మకం లేదు' అని సానియా చెప్పారు. రుఫా రమణి నిర్వహించిన 'ది ఛాంపియన్ కోడ్' పాడ్‌కాస్ట్‌లో ఆమె ఈ విషయాలు పంచుకున్నారు.

అయితే, తన రిటైర్మెంట్ తర్వాత భారత మహిళా టెన్నిస్ గ్రాండ్‌స్లామ్‌లకు దూరంగా మారడంపై సానియా తీవ్ర ఆందోళన వ్యక్తం చేశారు. 'మేము గ్రాండ్‌స్లామ్‌లు గెలిచే పోటీదారుల నుండి నేరుగా ప్రాతినిధ్యం లేని స్థితికి చేరుకున్నాం. ఈ శూన్యం అందరికీ అనిపించింది, కానీ నాకు మరింతగా తెలిసింది. నేను ఆ ecosystem లో భాగంగా ఉన్నాను' అని ఆమె వివరించారు.

ఈ నేపథ్యంలోనే 'Next Set' అనే కొత్త కార్యక్రమాన్ని సానియా ప్రారంభించారు. డబుల్స్‌లో టాప్ 100 ర్యాంకింగ్‌లోకి భారత మహిళా క్రీడాకారిణులు ప్రవేశించడమే తక్షణ లక్ష్యమని చెప్పారు. 'ప్రస్తుతం ఒక క్రీడాకారిణి 124 ర్యాంకులో ఉంది. ఒకటి రెండు మంచి టోర్నమెంట్లు ఆడితే టాప్ 100లోకి వచ్చేస్తుంది. కోచింగ్, ఫిజియో, మెంటార్‌షిప్‌తో వారికి చిన్న పుష్ ఇవ్వడమే మా లక్ష్యం' అన్నారు. ఇప్పటికే ఈ కార్యక్రమం కింద నలుగురు క్రీడాకారిణులు కోచ్‌తో మొరాకోలో శిక్షణ పొందుతున్నారు.

సెరెనా విలియమ్స్ కమ్‌బ్యాక్‌పై స్పందించిన సానియా, '44 ఏళ్ల వయసులో ఇద్దరు పిల్లల తల్లి తిరిగి వచ్చి తాను ఆపిన చోటు నుండే మళ్లీ ఆడగలిగితే, ప్రపంచంలోని గొప్ప అథ్లెట్ ఎవరనే చర్చకు తెరపడాల్సిందే' అని వ్యాఖ్యానించారు. కొడుకు ఇజాన్‌తో ఉన్న అనుబంధం, సింగిల్ పేరెంట్‌గా ఎదుర్కొన్న సవాళ్ల గురించి కూడా సానియా ఈ ఇంటర్వ్యూలో వివరంగా మాట్లాడారు.