గోల్కొండ జగదాంబికకు శ్రీకాంతాచారి బంగారు బోనం, బంగారు చీర సమర్పణ

బోనాల జాతర సందర్భంగా గోల్కొండ కోటలోని జగదాంబిక మహంకాళీ అమ్మవారికి మొదటి బోనం సమర్పించే కార్యక్రమం ఇవాళ ప్రారంభమైంది. ఛోటా బజార్కు చెందిన శ్రీకాంతాచారి తన ఇంటి నుండి బంగారు బోనం, బంగారు చీర, బంగారు కవచం తీసుకుని కోట వైపు ఊరేగింపు సాగించారు.

ఉదయం నుంచి శ్రీకాంతాచారి ఇంట్లో అమ్మవారి ఉత్సవ విగ్రహాలకు అభిషేకాలు, ఒడిబియ్యం, చీర సమర్పణ తర్వాత బోనం పూజ జరిగాయి. అనంతరం మధ్యాహ్నం 1 గంటకు ఊరేగింపు ప్రారంభమైంది.

దాదాపు 50 మంది పోతరాజులు, డప్పు వాయిద్యకారులు, మహిళలు, జంట నగరాలతో పాటు వరంగల్ తదితర ప్రాంతాల కళాకారులు ఈ ఊరేగింపులో పాల్గొన్నారు. కేరళ బ్యాండ్ కూడా విన్యాసాలు చేసింది. ఊరేగింపు కోటకు చేరడానికి సుమారు 5-6 గంటలు పడుతుందని, సాయంత్రం 5.30-6 గంటలకు చేరుకుంటుందని శ్రీకాంతాచారి తెలిపారు.

బంగారు బోనం, చీర రాక నేపథ్యంలో పోలీసులు ప్రత్యేక బందోబస్తు చేపట్టారు. కోటపై 350-400 మెట్లు ఎక్కి చేరుకున్నాక, అమ్మవారి విగ్రహానికి కవచం, చీర ధరింపజేసి, ఒడిబియ్యాలు, బోనం సమర్పించి గుమ్మడికాయ కొట్టడం వంటి సంప్రదాయాలు పాటిస్తారు.

బోనాల జాతర తెలంగాణ రాష్ట్ర పండగ. అమావాస్య తర్వాత గురువారం లేదా ఆదివారం ప్రారంభమయ్యే ఈ ఉత్సవాలు తొమ్మిది వారాలు కొనసాగుతాయి. వివిధ ప్రాంతాల నుండి భక్తులు గోల్కొండ కోటకు చేరుకుని అమ్మవారికి బోనాలు, నైవేద్యాలు సమర్పిస్తారు.

శ్రీకాంతాచారి మాట్లాడుతూ "గత రెండు సంవత్సరాలుగా బంగారు బోనంలో అమ్మవారికి నైవేద్యం సమర్పిస్తున్నాను. అమ్మవారు నా చేత చేయిస్తున్నందుకు చాలా సంతోషంగా ఉంది" అని తెలిపారు.