గోల్కొండలో బోనాల ప్రారంభం: మహంకాళి అమ్మవారికి బంగారు బోనం సమర్పణ

హైదరాబాద్‌లోని గోల్కొండ కోటలో బోనాల పండుగ ప్రారంభమైంది. తెలంగాణ సంప్రదాయంలో ఆషాఢ మాసం రాగానే గ్రామదేవతలకు బోనం సమర్పించే ఉత్సవాలు మొదలవుతాయి. గోల్కొండ మహంకాళి అమ్మవారి ఆలయంలో తొలి బోనం సమర్పించిన తర్వాతే రాష్ట్రవ్యాప్తంగా ఇతర ఆలయాల్లో ఈ వేడుకలు ప్రారంభమవుతాయని హిందూ ధర్మ చక్రం వ్యవస్థాపకులు శ్రీకాంత్ శర్మ తెలిపారు.

ఆషాఢ మాసంలో వర్షాలు ప్రారంభమవడంతో అంటువ్యాధుల ప్రభావం ఎక్కువగా ఉంటుందని, ప్రజలను రక్షించాలని అమ్మవారిని వేడుకోవడమే బోనాల పండుగ అని శర్మ వివరించారు. పసుపు, వేపాకులు యాంటీ బాక్టీరియల్ గుణాలున్నవి కాబట్టి బోనం తయారీలో వీటిని ఎక్కువగా ఉపయోగిస్తారు. కొత్త కుండ లేదా ఇత్తడి పాత్రను అలంకరించి అందులో నైవేద్యం పెడతారు; స్త్రీలు పసుపు రాసుకొని, కొత్త బట్టలు ధరించి బోనాన్ని తలపై పెట్టుకుని ఊరేగింపుగా ఆలయానికి చేరుకుంటారు.

చరిత్ర ప్రకారం, గోల్కొండతో పాటు లాల్ దర్వాజాలోని మహంకాళి అమ్మవారి ఆలయాన్ని అక్కన్న, మాదన్నలు స్థాపించారు. వీరు భద్రాచలం రామదాసుకు మేనమామలు అని శర్మ చెప్పారు. తొలి బోనం గోల్కొండలో సమర్పించిన తర్వాత, లాల్ దర్వాజా, సికింద్రాబాద్ ఉజ్జయిని మహంకాళి, షాలిబండ ఆలయాల్లో వేడుకలు కొనసాగుతాయి. మళ్లీ చివరిగా గోల్కొండలోనే సమాప్తమవుతాయి.

బోనం సమర్పించడానికి ప్రత్యేక సాంప్రదాయం ఉండాల్సిన అవసరం లేదని శర్మ సూచించారు. తెలంగాణలో పుట్టిన ప్రతి ఒక్కరూ తమ ఇంట్లో శుచిగా తయారు చేసిన నైవేద్యాన్ని తీసుకొచ్చి అమ్మవారికి సమర్పించవచ్చని వివరించారు. ఈ నేపథ్యంలో బోనాల ఉత్సవాలు రాష్ట్రవ్యాప్తంగా భక్తిశ్రద్ధలతో కొనసాగుతున్నాయి.