లాలూ ప్రసాద్‌ను చంపే కుట్ర: ఆకాష్ యాదవ్‌పై తేజ్ ప్రతాప్ ఫిర్యాదు

RJD అధినేత లాలూ ప్రసాద్ యాదవ్ పెద్ద కుమారుడు, JJD అధ్యక్షుడు తేజ్ ప్రతాప్ యాదవ్, సచివాలయ పోలీస్ స్టేషన్‌లో ఫిర్యాదు చేశారు. ఆకాష్ యాదవ్ అనే వ్యక్తి తనను చంపించేందుకు కుట్ర పన్నాడని, తన తండ్రి లాలూ ప్రసాద్‌ను కూడా చంపే ప్రయత్నం జరుగుతోందని ఆయన FIR లో పేర్కొన్నారు. తనపై చేస్తున్న ఆరోపణలన్నీ అవాస్తవమని, తన ఇమేజ్‌ను డ్యామేజ్ చేసేందుకు కావాలనే ఈ కుట్ర జరుగుతోందని తేజ్ ప్రతాప్ చెప్పారు. ఘటన జరిగిన సమయంలో బాత్‌రూమ్ సాకుతో పారిపోయానన్న వార్తలను ఆయన ఖండించారు. లాలూ ప్రసాద్ యాదవ్ అనారోగ్యంతో బాధపడుతున్నారని, ఈ పరిస్థితిలో కావాలనే వారిని మానసికంగా ఇబ్బంది పెట్టేందుకు ఈ కుట్ర చేస్తున్నారని తేజ్ ప్రతాప్ పోలీసులకు తెలిపారు. పోలీసులు FIR నమోదు చేసి దర్యాప్తు ప్రారంభించారు. ఈ ఫిర్యాదులో చాలా మంది పేర్లు ఉన్నాయని, పూర్తి వివరాలు త్వరలో వెల్లడిస్తామని తేజ్ ప్రతాప్ మీడియాకు చెప్పారు.