2028 ఎన్నికల లక్ష్యంగా తెలంగాణ బీజేపీ సంస్థాగత బలోపేతంపై దృష్టి

2028 శాసనసభ ఎన్నికలను లక్ష్యంగా చేసుకుని తెలంగాణ బీజేపీ సంస్థాగత బలోపేతంపై దృష్టి పెట్టింది. ఇటీవల జరిగిన పార్టీ పదాధికారుల సమావేశంలో బూత్ స్థాయి నుంచి పార్టీని బలోపేతం చేసే దిశగా కీలక నిర్ణయాలు తీసుకున్నట్టు పార్టీ వర్గాలు తెలిపాయి.

ఆగస్టు 15 లోపు జిల్లా కోర్ కమిటీలు, మండల కమిటీలు, అన్ని మోర్చా కమిటీలను పూర్తి చేయాలని రాష్ట్ర నాయకత్వం ఆదేశించింది. కమిటీల ఏర్పాటుకు జిల్లా నాయకత్వానికి పూర్తి స్వేచ్ఛ ఇస్తున్నామని, గడువులోగా పూర్తి చేయకపోతే ఆగస్టు 15 తర్వాత నేరుగా రాష్ట్ర నాయకత్వమే కమిటీలను ఏర్పాటు చేస్తుందని హెచ్చరించారు.

పార్టీ కార్యక్రమాల పట్ల అలసత్వం ప్రదర్శించే జిల్లా అధ్యక్షులను మార్చేందుకు వెనకాడబోమని స్పష్టం చేశారు. పార్టీలో గ్రూప్ రాజకీయాలు ఉండబోవని, గ్రూపులు కడితే సహించేది లేదని సంస్థాగత ఇంచార్జ్ సునీల్ బన్సల్ హెచ్చరించారు.

పార్టీలో చిన్న, పెద్ద నాయకులందరినీ కలుపుకుని ముందుకు వెళ్ళాలని, ఎన్నికల్లో పోటీ చేసిన అభ్యర్థుల అభిప్రాయాలు తీసుకోవాలని సూచించారు. ఇక చేరికలపై దృష్టి పెట్టడంతో పాటు, కాంగ్రెస్ ప్రభుత్వ విధానాలపై ఆందోళనలు చేపట్టాలని నిర్దేశించారు.

పదవులు తీసుకొని నిష్క్రియంగా ఉంటే కుదరదని, పదాధికారుల పనితీరుపై ఇకపై ఘటన సమీక్ష ఉంటుందని సునీల్ బన్సల్ హెచ్చరించారు. ఎన్ని కార్యక్రమాల్లో పాల్గొన్నారు, ఎన్ని నిర్వహించారనే వివరాలు తదుపరి సమావేశాల్లో నివేదించాల్సి ఉంటుందని తెలిపారు.

గ్రేటర్ హైదరాబాద్ లోని మూడు కార్పొరేషన్లతో పాటు ఖమ్మం, వరంగల్ కార్పొరేషన్లపై ఎన్నికల వ్యూహాలను జాతీయ నాయకులు సిద్ధం చేస్తున్నట్టు సమాచారం. మొత్తంగా 2028 ఎన్నికలను టార్గెట్‌గా చేసుకొని తెలంగాణ బీజేపీ సంస్థాగతంగా వేగంగా కదులుతోంది.