ప్రపంచ ఆదివాసి దినోత్సవం: రాష్ట్రవ్యాప్తంగా వేడుకలు; సీఎం రేవంత్ రెడ్డి శుభాకాంక్షలు

ఆగస్టు 9న ప్రపంచ ఆదివాసి దినోత్సవాన్ని తెలంగాణ వ్యాప్తంగా ఘనంగా నిర్వహించారు. ముఖ్యమంత్రి రేవంత్ రెడ్డి రాష్ట్ర ప్రజలకు శుభాకాంక్షలు తెలిపారు.

అడవిని దైవంగా, ప్రకృతిని తల్లిగా భావించే గిరిజనుల సంస్కృతి, హక్కులను గౌరవించాలని ఆయన పిలుపునిచ్చారు. ప్రకృతి పరిరక్షణకు కట్టుబడి ఉన్న ఆదివాసీలు అందరికీ ఆదర్శంగా నిలుస్తారని చెప్పారు.

ఆదిలాబాద్ జిల్లా ఇచ్చోడ మండలంలో ట్రైబల్ రెసిడెన్షియల్ స్కూల్, కాలేజీ విద్యార్థులు ర్యాలీ నిర్వహించారు. కొమరం భీం, బీర్సాముండ వేషాధారణలతో పాఠశాల నుంచి కొమరం భీం చౌక్ వరకు ర్యాలీ సాగింది. ఆదివాస నాయకులు అమరవీరుల త్యాగాలను గుర్తు చేశారు.

కొమరంభీం జిల్లా కౌటాల మండలంలో 20 గ్రామాల నుంచి పెద్ద సంఖ్యలో ఆదివాసీలు, ప్రజా ప్రతినిధులు, మహిళలు తరలి వచ్చారు. డోలు, సన్నాయి వాయిద్యాలతో తమ సంప్రదాయాలను ప్రదర్శించారు. కొమరం భీం విగ్రహం వద్ద ప్రత్యేక పూజలు చేసి ఆదివాసి జెండా ఎగరవేశారు.

జిల్లా కేంద్రంలోని వేడుకల్లో కలెక్టర్ హరిత, ఎస్పీ నికితా పంత్ పాల్గొని ఆదివాసీల వేషాధారణలో కనిపించారు. కొమరంభీం విగ్రహానికి పూలమాలలు వేసి నివాళులు అర్పించారు. ఉట్నూరులో జరిగిన కార్యక్రమంలో కలెక్టర్, ఎస్పీ, ఐటీడీఏ పీవోలు ఆదివాసీలతో కలిసి డాన్సులు చేశారు. ఆదివాసి సంస్కృతిని ప్రోత్సహించేందుకు పర్యాటక కేంద్రాల ఏర్పాటు చేయాలని పలువురు కోరారు.