తెలంగాణలో పంటల సాగు విస్తీర్ణం 10% పెరిగింది: PJTSAU

తెలంగాణలో ఈ ఏడాది వానాకాలం పంటల సాగు విస్తీర్ణం గతేడాది ఇదే కాలంతో పోలిస్తే 10% పెరిగిందని ప్రొఫెసర్ జయశంకర్ తెలంగాణ రాష్ట్ర వ్యవసాయ విశ్వవిద్యాలయం (PJTSAU) వెల్లడించింది.

విశ్వవిద్యాలయం పరిధిలోని సెంటర్ ఫర్ డిజిటల్ అగ్రికల్చర్ అండ్ టెక్నాలజీ సేకరించిన ఉపగ్రహ చిత్రాల విశ్లేషణ ద్వారా ఈ వివరాలు రూపొందించారు. జూలై 29, 2026 నాటికి రాష్ట్రంలో సాధారణ పంటల విస్తీర్ణం 98.13 లక్షల ఎకరాలు కాగా, ఇప్పటికే 33 లక్షల ఎకరాల్లో (34%) వివిధ పంటలు విత్తారు. గతేడాది ఇదే సమయంలో ఇది 24%గా ఉండేదని, ఈ ఏడాది 10% అధికంగా నమోదైందని వైస్ ఛాన్సలర్ ప్రొఫెసర్ అల్దాస్ జానయ్య తెలిపారు.

జిల్లాల వారీగా చూస్తే, అత్యధికంగా యాదాద్రి భువనగిరిలో 57%, మేడ్చల్ మల్కాజిగిరిలో 54%, జనగామలో 51% విస్తీర్ణంలో పంటలు వేశారు. అత్యల్పంగా ఖమ్మంలో 16.5%, వనపర్తిలో 17.3%, వరంగల్‌లో 21.1% నమోదైంది.

పంటల వారీగా చూస్తే, వరి, పత్తి, మొక్కజొన్న పంటలే అత్యధిక విస్తీర్ణంలో సాగవుతున్నాయి. అయితే పప్పు ధాన్యాలు, నూనె గింజల సాగులో పెరుగుదల కనిపించింది. ప్రభుత్వం చేపట్టిన పంటల మార్పిడి అవగాహన కార్యక్రమాలే ఈ పెరుగుదలకు కారణమని విశ్వవిద్యాలయం పేర్కొంది. ఎల్‌నినో ప్రభావం తగ్గడం, అనుకూల వాతావరణం పంటల సాగుకు దోహదపడ్డాయని PJTSAU తెలిపింది.