తాగునీటి కొరత నివారణకు తెలంగాణ సర్కారు దేవాదుల జలాలతో రిజర్వాయర్లు నింపుతోంది

ఎల్నినో ప్రభావంతో వర్షాభావ పరిస్థితులు ఏర్పడిన నేపథ్యంలో, తాగునీటి కొరతను నివారించేందుకు తెలంగాణ ప్రభుత్వం ప్రణాళికాబద్ధమైన చర్యలు చేపట్టింది. 2027 జూలై వరకు తాగునీటి సమస్య రాకుండా దేవాదుల ప్రాజెక్టు ద్వారా గోదావరి జలాలను రిజర్వాయర్లలో నిల్వ చేస్తోంది.

ఈ కార్యక్రమంలో భాగంగా, మంత్రులు పొంగులేటి శ్రీనివాస్ రెడ్డి, పొన్నం ప్రభాకర్‌లు ఇటీవల వరంగల్‌లో జిల్లా కలెక్టర్లతో సమీక్షా సమావేశం నిర్వహించారు. వరంగల్, హనుమకొండ, జనగామ, మహబూబాబాద్, జయశంకర్ భూపాలపల్లి, ములుగు జిల్లాల అధికారులు ఇందులో పాల్గొన్నారు. ఎల్నినో వల్ల ఏర్పడే తాగునీటి, సాగునీటి ఇబ్బందులను ఎదుర్కొనే చర్యలపై వారు చర్చించారు.

దేవాదుల ప్రాజెక్టు వరంగల్‌తో పాటు నల్గొండ, ఖమ్మం జిల్లాలకు ప్రధాన జలవనరు. ధర్మసాగర్ రిజర్వాయర్‌ను పూర్తిగా నింపితే 135 రోజుల పాటు వరంగల్ నగర తాగునీటి అవసరాలు తీరుతాయి. ప్రస్తుతం భీమగన్పూర్, రామప్ప, ధర్మసాగర్ సహా 22 రిజర్వాయర్లను గోదావరి జలాలతో నింపుతున్నామని దేవాదుల ప్రాజెక్టు సీఈ సుధీర్ తెలిపారు. 2027 జూలై వరకు తాగునీటికి ఎలాంటి సమస్యా రాకుండా ఉండేలా నీటి నిల్వ చేయాలని ఉన్నతాధికారులు ఆదేశాలు ఇచ్చినట్లు ఆయన వివరించారు.

రైతులను సాగునీటి కొరత నుండి రక్షించేందుకు ప్రభుత్వం ఆరుతడి పంటల వైపు మరలమని సూచిస్తోంది. నీటి వృధాను అరికట్టేందుకు ప్రతి ఇంటికి ఇంకుడు గుంత ఏర్పాటు చేసుకోవాలని సూచించింది. వర్షపు నీటిని భూమిలోకి పంపించి భూగర్భ జలాలు పెంచుకోవాలని ప్రభుత్వం ప్రజలను కోరింది.