తెలంగాణ హైకోర్టు HYDRA కమిషనర్ రంగనాథ్‌ను తొలగించాలని ఆదేశం

తెలంగాణ హైకోర్టు HYDRA కమిషనర్ రంగనాథ్‌ను పదవి నుండి తొలగించాలని రాష్ట్ర ప్రభుత్వ ప్రధాన కార్యదర్శిని ఆదేశించింది. ఈ ఉత్తర్వులు బుధవారం న్యాయమూర్తి జస్టిస్ అనిల్ కుమార్ ధర్మాసనం నుండి వెలువడ్డాయి.

లోతుకుంట ప్రాంతంలోని భూముల వివాదానికి సంబంధించిన కంటెంప్ట్ పిటిషన్‌ను విచారిస్తూ హైకోర్టు ఈ నిర్ణయం తీసుకుంది. గతంలో రంగనాథ్‌ను కోర్టుకు హాజరుకావాలని ఆదేశించగా, ఈరోజు ఆయన అఫిడవిట్ దాఖలు చేసి క్షమాపణ కూడా చెప్పారు. అయితే కోర్టు ఆ క్షమాపణను ఆమోదించలేదు.

HYDRA సంస్థ ఏర్పాటైనప్పటి నుంచి రంగనాథ్‌పై వివిధ ధర్మాసనాల్లో 70కి పైగా కోర్టు ధిక్కార పిటిషన్లు నమోదైనట్లు కోర్టు గుర్తించింది. పదేపదే ఇలాంటి ఉల్లంఘనలకు పాల్పడుతున్న అధికారిని అదే పదవిలో కొనసాగించడం సమంజసం కాదని ధర్మాసనం అభిప్రాయపడింది.

వెంటనే రంగనాథ్ స్థానంలో ఒక సెక్రటరీ స్థాయి అధికారిని నియమించాలని కూడా కోర్టు ప్రభుత్వాన్ని ఆదేశించింది. ఈ వ్యవహారంలో పూర్తి ఆర్డర్ కాపీ రాగానే అన్ని వివరాలు వెల్లడవుతాయని జడ్జి తెలిపారు.

హైదరాబాద్, పరిసర ప్రాంతాల్లో అక్రమ నిర్మాణాల తొలగింపు కోసం రాష్ట్ర ప్రభుత్వం ఏర్పాటు చేసిన HYDRA సంస్థకు రంగనాథ్ తొలి కమిషనర్. కొన్ని అక్రమ నిర్మాణాలను ఎంపిక చేసి కూల్చివేస్తున్నారన్న ఆరోపణలతో సహా ఆయనపై అనేక వివాదాలు ఉన్నాయి. ప్రభుత్వం ఈ ఉత్తర్వులపై త్వరలో నిర్ణయం తీసుకోవాల్సి ఉంది.