తెలంగాణలో మూడు రోజుల పల్స్ పోలియో కార్యక్రమం ప్రారంభం

తెలంగాణలో పల్స్ పోలియో కార్యక్రమం ప్రారంభమైంది. ఐదేళ్ల లోపు చిన్నారులకు ఉచిత పోలియో చుక్కల మందు వేస్తున్నారు. ఈ కార్యక్రమం మూడు రోజుల పాటు కొనసాగుతుంది.

రాష్ట్రవ్యాప్తంగా 22,979 బూత్ సెంటర్లను ఏర్పాటు చేశారు. ఉదయం 7 గంటల నుంచి సాయంత్రం 6 గంటల వరకు ఈ సేవలు అందుబాటులో ఉంటాయి. బస్ స్టాండ్లు, రైల్వే స్టేషన్లతో సహా 903 ట్రాన్సిట్ పాయింట్లలోనూ డ్రాప్స్ వేస్తున్నారు. మారుమూల ప్రాంతాలకు 903 మొబైల్ టీమ్లు వెళ్తున్నాయి.

పీహెచ్‌సీ సిబ్బంది, ఏఎన్ఎంలు, ఆశా కార్యకర్తలు, అంగన్‌వాడీ టీచర్లు ఈ కార్యక్రమంలో పాల్గొంటున్నారు. రాష్ట్ర ప్రభుత్వం 40,97,749 మంది చిన్నారులకు చుక్కల మందు వేయాలని లక్ష్యంగా పెట్టుకుంది. హైదరాబాద్, రంగారెడ్డి, మేడ్చల్, సంగారెడ్డి జిల్లాల్లో జనసాంద్రత ఎక్కువగా ఉండడంతో, జూలై 1 వరకు ఈ డ్రైవ్ కొనసాగించనున్నారు.

పిల్లలకు పోలియో చుక్కలు వేయించాలని తల్లిదండ్రులకు ప్రభుత్వం విజ్ఞప్తి చేసింది. గతంలో వేయించినా, ఇప్పుడు మరోసారి వేయించడం సురక్షితమని వైద్య నిపుణులు తెలిపారు. పోలియో నిర్మూలన కోసం దేశవ్యాప్తంగా ప్రతి సంవత్సరం ఈ పల్స్ పోలియో కార్యక్రమాన్ని కేంద్రం నిర్వహిస్తుంది.