తెలంగాణ ఉద్యోగులకు కొత్త ఆరోగ్య పథకం ప్రారంభం; డిప్యూటీ సీఎం భట్టి విక్రమార్క ప్రారంభించనున్నారు

తెలంగాణ ప్రభుత్వ ఉద్యోగులకు రాష్ట్ర ప్రభుత్వం కొత్త ఉద్యోగుల ఆరోగ్య పథకం (EHS) ను ఈ రోజు ప్రారంభించనుంది. డిప్యూటీ సీఎం మల్లు భట్టి విక్రమార్క సచివాలయంలో మధ్యాహ్నం 1:00 గంటలకు ఈ పథకాన్ని లాంఛనంగా ప్రారంభిస్తారు.

ఈ సందర్భంగా ఉద్యోగుల కోసం రూపొందించిన కొత్త EHS పోర్టల్, హెల్త్ కార్డుల పంపిణీ కూడా ప్రారంభమవుతుంది. ఈ పథకం ద్వారా ప్రభుత్వ ఉద్యోగులు, వారి కుటుంబ సభ్యులకు మెరుగైన వైద్య సేవలు లభించనున్నాయి.

EHS అమలుపై రాష్ట్ర ప్రభుత్వం ఉత్తర్వులు జారీ చేసింది. ఉద్యోగుల ఆరోగ్య సంరక్షణ ట్రస్ట్ బోర్డును పునర్వ్యవస్థీకరించి, అందులో ఉద్యోగ సంఘాల, రిటైర్డ్ ఉద్యోగుల ప్రతినిధులకు స్థానం కల్పించారు.

EHS నిధుల కోసం ఉద్యోగుల బేసిక్ పే నుంచి 1.5%, పెన్షనర్ల బేసిక్ పెన్షన్ నుంచి 1.5% కంట్రిబ్యూషన్ విధానం అమలు చేస్తారు. నిధులను పారదర్శకంగా, జవాబుదారీగా వినియోగించే బాధ్యత ట్రస్ట్ బోర్డుదేనని ప్రభుత్వం స్పష్టం చేసింది.