తెలంగాణ ఎస్ఎస్ఆర్: 73 లక్షల ఫారాలు అందలేదు; డ్రాఫ్ట్ జాబితా ఈ నెల 17న

తెలంగాణలో ప్రత్యేక సంక్షిప్త పునర్విలోకనం (SSR) ప్రక్రియ ముగిసిందని రాష్ట్ర ఎన్నికల సంఘం ప్రకటించింది. రాష్ట్రంలో మొత్తం 3,38,26,448 మంది ఓటర్లకు ఎన్యుమరేషన్ ఫారాలు పంపగా, 73,39,223 ఫారాలు తిరిగి అందలేదని తెలిపింది.

అందని ఫారాల్లో శాశ్వతంగా మరోచోటికి మారినవారు 45,18,961 మంది, గుర్తించలేని వారు 11,25,546 మంది, మరణించిన ఓటర్లు 9,22,230 మంది ఉన్నట్లు ఎన్నికల సంఘం వివరించింది. మరో 6,70,203 మంది ఇప్పటికే ఇతర చోట్ల నమోదైనట్లు, 22,294 మంది ఇతర కారణాలతో ఫారాలు అందనట్లు తేలింది.

మొత్తం పంపిన ఫారాల్లో 78.30 శాతం అంటే 2,64,87,214 ఫారాలు తిరిగి వచ్చాయి. వీటన్నిటినీ డిజిటలైజ్ చేశారు. హైదరాబాద్, రంగారెడ్డి జిల్లాల్లో అందని ఫారాల సంఖ్య ఎక్కువగా ఉండగా, గ్రామీణ ప్రాంతాల్లో దాదాపు 100% నమోదు పూర్తయింది.

SSR ప్రక్రియ పూర్తయిన నేపథ్యంలో ఎన్నికల సంఘం ఈ నెల 17న ముసాయిదా ఓటర్ల జాబితాను విడుదల చేయనుంది. ఆ తర్వాత ఒక నెల పాటు కొత్త ఓటర్ల నమోదుకు, పెండింగ్ ఫారాల పరిష్కారానికి అవకాశం కల్పిస్తారు. ఈ గడువు ముగిసిన తర్వాత తుది ఓటరు జాబితాపై స్పష్టత వస్తుంది.