ఢిల్లీ, ఉత్తరాఖండ్‌లో ఉగ్రదాడుల హెచ్చరిక: భద్రత కట్టుదిట్టం

ఢిల్లీ, ఉత్తరాఖండ్‌లలో ఉగ్రదాడులు జరిగే అవకాశం ఉందని కేంద్ర నిఘా వర్గాలు హెచ్చరించాయి. గుర్తు తెలియని వ్యక్తి పంపిన ఈమెయిల్‌ను ఆధారంగా చేసుకుని ఈ హెచ్చరిక జారీ చేశారు.

ఈమెయిల్‌లో ప్రార్థనా స్థలాలు, ప్రభుత్వ కార్యాలయాలు, పోలీస్ స్టేషన్లు, రైల్వే స్టేషన్లు వంటి సున్నిత ప్రాంతాలపై దాడులు జరపొచ్చని పేర్కొన్నారు. ఈ బెదిరింపు వెనుక ఖలిస్తాన్ ఉగ్రవాద సంస్థ ఉండొచ్చని నిఘా వర్గాలు అనుమానిస్తున్నాయి.

దీంతో ఢిల్లీ, ఉత్తరాఖండ్‌లలో భద్రతా ఏర్పాట్లు పెంచారు. సున్నిత ప్రదేశాలు, సరిహద్దు ప్రాంతాలు, రద్దీ ప్రాంతాల్లో తనిఖీలు ముమ్మరం చేశారు. పోలీసులు అప్రమత్తంగా ఉంటూ నిఘా పెంచారు.

మెయిల్ పంపిన వ్యక్తిని గుర్తించేందుకు ఐపి అడ్రస్ ఆధారంగా దర్యాప్తు జరుగుతోంది. ఇటీవల ఇలాంటి ఈమెయిల్‌లు వరసగా వస్తున్నాయని, కానీ ప్రతిసారీ భద్రతా చర్యలు తీసుకుంటున్నామని నిఘా అధికారులు తెలిపారు. ప్రస్తుతం ఈ రెండు రాష్ట్రాల్లో హై అలర్ట్ కొనసాగుతోంది.