తిరుమల జేష్టాభిషేక మహోత్సవాలు 26 నుంచి 28 వరకు

తిరుమల శ్రీవారి ఆలయంలో సాలకట్ల జేష్టాభిషేక మహోత్సవం జూన్ 26 నుంచి 28 వరకు మూడు రోజులు జరగనుంది. ప్రతి సంవత్సరం జేష్ఠ మాసంలో జేష్ఠ నక్షత్రం ముగిసే సమయంలో ఈ ఉత్సవం నిర్వహిస్తారు.

ఆలయ ప్రధాన అర్చకులు వేదగోపాల దీక్షితులు తెలిపిన వివరాల ప్రకారం, ఈ ఏడాది గత సంవత్సరం సమర్పించిన బంగారు కవచాలను తొలగించి, స్వామివారి నిజ స్వరూపాన్ని భక్తులు దర్శించడానికి అవకాశం ఉంటుంది. ఉత్సవ మూర్తులను అభిషేకాల నుంచి పరిరక్షించేందుకు ఈ ఉత్సవాన్ని అభిద్యేయక అభిషేకంగా కూడా వ్యవహరిస్తారు.

మొదటి రోజు మలయప్ప స్వామి వారు ఉభయ దేవేరులతో కల్యాణ మండపానికి చేరుకుంటారు. అక్కడ పుణ్యాహవచనం, రక్షాబంధనం, అంకురార్పణ, అగ్ని ప్రతిష్ఠ వంటి పూజలు జరుగుతాయి. అష్టోత్తర శత కలశాలతో పాటు గోక్షీరం, గోదది, మధు, కొబ్బరి నీళ్లు, చందనం, పసుపు నీళ్లు వంటి పవిత్ర ద్రవ్యాలతో స్వామి వారికి స్నపన తిరుమంజనం నిర్వహిస్తారు.