తిరుపతిలో దీపావళి సంబరాలు... టపాసుల ధరలు పెరిగినా కొనుగోళ్లు కొనసాగుతున్నాయి

తిరుపతిలో దీపావళి వేడుకలు ఘనంగా జరుగుతున్నాయి. దీపాల వెలుగులు, టపాసుల మోతలు, చిన్నారుల కేరింతలతో నగరం సందడిగా మారింది. పండుగ సందర్భంగా నగరంలోని టపాసుల దుకాణాల్లో కొనుగోలుదారుల రద్దీ కనిపిస్తోంది.

తిరుపతి శివారులోని రామాపురం ప్రాంతం టపాసుల దుకాణాలకు ప్రసిద్ధి. ఇక్కడి గోదాముల్లో పెద్ద ఎత్తున టపాసులను నిల్వ చేసి విక్రయిస్తున్నారు. ఒక్కో దుకాణంలో 100 నుంచి 120 రకాల టపాసులు అందుబాటులో ఉన్నాయని దుకాణ యజమానులు తెలిపారు. ఫ్యాన్సీ ఐటమ్స్, స్పార్క్లర్స్, రాకెట్లకు డిమాండ్ ఉందని వారు చెప్పారు.

ఈ ఏడాది టపాసుల ధరలు పెరిగాయని కొనుగోలుదారులు అంటున్నారు. అయినా పిల్లల కోసం కొనాల్సి వస్తోందని తల్లిదండ్రులు చెప్తున్నారు. ఒక్కొక్కరు ₹3,000 నుంచి ₹7,000 వరకు ఖర్చు చేస్తున్నారని, కొందరు బృందాలుగా వచ్చి కొంటున్నారని వారు తెలిపారు.

రామాపురం దుకాణాలకు చుట్టుపక్కల గ్రామాల నుంచి కొనుగోలుదారులు వస్తున్నారు. చంద్రగిరి, శ్రీకాళహస్తి, ఏర్పేడు, ఎస్‌ఆర్ పురం, చిత్తూరు తరఫు నుంచి కూడా జనం వస్తున్నట్టు దుకాణ యజమానులు తెలిపారు. కొందరు సుమారు 120 కిలోమీటర్ల దూరం నుంచి కూడా వస్తున్నారని వారు పేర్కొన్నారు.

ధరలు పెరిగినా అమ్మకాలు బాగానే ఉన్నాయని వర్తకులు చెప్తున్నారు. కొనుగోలుదారులకు హోల్‌సేల్ ధరలకే ఇస్తూ డిస్కౌంట్లు కూడా ఇస్తున్నట్టు వారు తెలిపారు.