తిరుపతి రూరల్‌లో 93 లక్షల ఇంటి దొంగతనం ఛేదించిన పోలీసులు; బంధువు సహా ముగ్గురి అరెస్ట్

తిరుపతి రూరల్ పరిధిలోని చెర్లపల్లి తాటి తోపులో 93 లక్షల విలువైన ఆభరణాలు, నగదు అపహరణ కేసును 24 గంటల్లో పోలీసులు ఛేదించారు. ముగ్గురు నిందితులను అరెస్ట్ చేశారు.

యశోదమ్మ అనే మహిళ ఇంట్లో బంగారు ఆభరణాలు 600 గ్రాములు, వెండి ఆభరణాలు ఒకటిన్నర కిలోలు, 50 వేల నగదు చోరీ అయ్యాయి. మొత్తం విలువ 93 లక్షలు ఉంటుంది.

ఈ చోరీకి సూత్రధారి యశోదమ్మ మనవరాలు సోనియా (27) అని పోలీసులు గుర్తించారు. ఆమెతో పాటు చెర్లపల్లికి చెందిన బాబు, సింగాళకుండ (తిరుపతి పట్టణం) చెందిన అనిత అనే ఇద్దరు నిందితులను కూడా అదుపులోకి తీసుకున్నారు. సోనియాకు బాధితురాలి ఇంటి పరిస్థితులు, లాకర్ ఎక్కడ ఉంటుందో తెలుసు. దీంతో ముగ్గురు కలిసి పథకం వేసి, ఇంట్లో ఎవరూ లేని సమయంలో స్కూటర్‌పై వచ్చి దొంగతనం చేశారు.

పోలీసులు నిందితుల వద్ద నుంచి స్కూటర్, బీరువా పగల గొట్టేందుకు ఉపయోగించిన ఇనుప పారా, లాకర్ కట్ చేసే కటింగ్ మిషన్, చోరీ చేసిన ఆభరణాలు, నగదు స్వాధీనం చేసుకున్నారు. కేసు నమోదు చేసి దర్యాప్తు పూర్తి చేశారు.