టీఎంసీలో మూడు వర్గాలు: మమతా పార్టీ చైర్‌పర్సన్ కాదని రితబ్రత వర్గం ప్రకటన

పశ్చిమ బెంగాల్‌లో టీఎంసీని కుదిపేస్తున్న అంతర్గత తిరుగుబాటు మరో మలుపు తిరిగింది. రితబ్రత బెనర్జీ నేతృత్వంలోని వర్గం అభిషేక్ బెనర్జీని పార్టీ నుంచి సస్పెండ్ చేస్తూ తీర్మానం చేయడంతో పాటు మమతా బెనర్జీ ఇకపై పార్టీ చైర్‌పర్సన్ కాదని ప్రకటించింది. దీంతో టీఎంసీలో మూడు వేర్వేరు వర్గాలు ఏర్పడ్డాయి.

ప్రస్తుతం టీఎంసీలో మమతా బెనర్జీ వర్గం ఒకటి, కోల్‌కతాలో పార్టీ లెగసీపై హక్కు చెప్తున్న రితబ్రత బెనర్జీ నేతృత్వంలోని తిరుగుబాటు వర్గం రెండోది, ఢిల్లీలో ఎన్డీఏతో జతకట్టిన కాకోలి ఘోష్ దస్తిదార్ నేతృత్వంలోని పార్లమెంటరీ బ్లాక్ మూడోది. ఈ మూడు వర్గాలూ తామే నిజమైన టీఎంసీ అని చెప్పుకుంటున్నాయి. ఇది కోర్టు దాకా వెళ్లే అవకాశం ఉందని రాజకీయ విశ్లేషకులు అంచనా వేస్తున్నారు.

రితబ్రత వర్గం తాము బీజేపీ వ్యతిరేక శక్తిగా, బాధ్యతాయుతమైన ప్రతిపక్షంగా వ్యవహరిస్తామని చెబుతోంది. కాకోలి ఘోష్ దస్తిదార్ వర్గం ఎన్డీఏతో కలిసి పనిచేస్తోంది. మమతా వర్గంలో ఇప్పుడు కొద్దిమంది మాత్రమే మిగిలారు.

ఈ మొత్తం వ్యవహారం చాలా కాలంగా ప్రణాళికాబద్ధంగా జరిగింది. ముందు ఎమ్మెల్యేలు, తర్వాత ఎంపీలు, ఇప్పుడు కౌన్సిలర్లు ఒకరి తర్వాత ఒకరు పార్టీని వీడుతున్నారు. రితబ్రత వర్గం త్వరలోనే అసెంబ్లీ స్పీకర్, ఎన్నికల కమిషన్ వంటి సమర్థ అధికారులను ఆశ్రయించనున్నట్లు ప్రకటించింది. మమతా వర్గం కూడా న్యాయపరమైన చర్యలు తీసుకునే దిశగా ఆలోచిస్తోందని సంకేతాలు ఇస్తోంది. ఇప్పటికే పార్టీ నుంచి విడిపోయిన నేతలు చాలా సంవత్సరాలుగా అవకాశాలకు దూరమైన సీనియర్లే కావడం గమనార్హం. మమతా, అభిషేక్‌ల రాజకీయ భవిష్యత్తు ప్రస్తుతానికి సందిగ్ధంలో పడింది.