ట్రైనీ IPS ఉదయ్ కృష్ణారెడ్డి పరారీలో ఉన్నట్లు సమాచారం; విచారణకు హాజరుకావడం లేదు

మహిళా ట్రైనీ IPS అధికారిని వేధించిన ఆరోపణలు ఎదుర్కొంటున్న ట్రైనీ IPS అధికారి ఉదయ్ కృష్ణారెడ్డి ప్రస్తుతం అజ్ఞాతంలో ఉన్నట్లు తెలుస్తోంది.

విచారణకు హాజరు కావాలని నోటీసులు అందించేందుకు హైదరాబాద్‌లోని ఆయన రెండు చిరునామాలకు అధికారులు వెళ్లగా ఆయన లభించలేదు. ఆయన మొబైల్ స్విచ్ఛాఫ్‌లో ఉండటంతో సంప్రదించడం సాధ్యం కాలేదు.

ఈ కేసులో ఆయనపై నేషనల్ పోలీస్ అకాడమీ (NPA) నుంచి తాత్కాలిక సస్పెన్షన్ విధించారు. తనపై కేసు నమోదైన తర్వాత తీవ్ర మానసిక ఒత్తిడికి గురై, అధిక మోతాదులో మద్యం సేవించి ఆసుపత్రి పాలయ్యారు. అయితే, ఆ తర్వాత విచారణ ఎదుర్కోవాల్సిన పరిస్థితి ఏర్పడింది.

కోర్టు ఆయన వేసిన మధ్యంతర ఉత్తర్వుల పిటిషన్‌ను తిరస్కరించింది. పోలీసుల విచారణకు పూర్తిగా సహకరించాలని ఆదేశించింది. తాజాగా ఆయన దాఖలు చేసిన మరో పిటిషన్‌పై కోర్టు వాయిదా వేసింది.

ప్రస్తుతం పోలీసులు ఆయన ఆచూకీ కోసం గాలింపు చర్యలు చేపట్టారు. అరెస్ట్ అయ్యే ప్రమాదం ఉండటంతోనే ఆయన పరారీలో ఉన్నట్లు అనుమానిస్తున్నారు.