యూట్యూబర్ రావణ్‌పై UAPA కేసు నమోదు: ప్రకాశ్ రాజ్‌తో ఆడియో క్లిప్‌లపై దర్యాప్తు

యూట్యూబర్ బచ్చలకూరి జోసెఫ్ అలియాస్ రావణ్‌పై చట్ట వ్యతిరేక కార్యకలాపాల నిరోధక చట్టం అంటే UAPA కింద కేసు నమోదైంది. సీఎం చంద్రబాబు, డిప్యూటీ సీఎం పవన్ కళ్యాణ్‌పై అనుచిత వ్యాఖ్యలు చేసిన రావణ్ ఇప్పటికే నాలుగు సార్లు అరెస్ట్ అయి బెయిల్‌పై విడుదలయ్యాడు. గన్నవరం పోలీసులు BNS సెక్షన్లు 147, 148, 152, 192, 197వడి, 353వబి తోపాటు UAPA సెక్షన్ 39 కింద కేసు నమోదు చేశారు.

ఈ నేపథ్యంలో రావణ్‌కు నటుడు ప్రకాశ్ రాజ్‌కు మధ్య జరిగిన సంభాషణ ఆడియో క్లిప్పులు బయటపడటం సంచలనం సృష్టించింది. మత, కుల ఘర్షణలు రెచ్చగొట్టేలా ఇద్దరూ కలిసి తాడేపల్లి డైరెక్షన్‌లో కుట్రలు పన్నుతున్నారని ఆరోపణలు వెల్లువెత్తాయి. ఆడియో క్లిప్‌లో ప్రకాశ్ రాజ్ YouTube లైవ్‌కు సంబంధించి రావణ్‌తో మాట్లాడటం వినిపించింది.

మంత్రి కందుల దుర్గేష్ మాట్లాడుతూ, రాష్ట్రంలో శాంతి భద్రతలకు సమస్య కలిగించేందుకు ప్రకాశ్ రాజ్, రావణ్ కలిసి సోషల్ మీడియా వేదికగా ప్లాన్ చేస్తున్నారని ఆరోపించారు. తాడేపల్లి పార్టీ డొల్ల కంపెనీల ద్వారా వారికి నిధులు అందుతున్నాయని ఆరోపించారు. 2019 నుంచి 2024 వరకు ప్రకాశ్ రాజ్ ఎందుకు మాట్లాడలేదని నిలదీశారు.

న్యాయ నిపుణుడు ముప్పాల సుబ్బారావు మాట్లాడుతూ, ఇంటెలిజెన్స్ వర్గాలు రాష్ట్ర ప్రభుత్వాన్ని అస్థిరపరిచేందుకు కుట్రలు జరుగుతున్నాయని నిర్ధారించిన తర్వాతే UAPA కేసు నమోదు చేశారని తెలిపారు. కాల్ డేటా రికార్డులు, వాయిస్ విన్న తర్వాత కుట్ర కోణం స్పష్టమైందని చెప్పారు. బస్సులు, రైళ్లు తగలబెట్టడం, ప్రభుత్వాన్ని అవమానపరచడం వంటి ఆలోచనలు సంభాషణలో ఉన్నట్లు నిర్ధారణకు వచ్చారని తెలిపారు.

UAPA చట్టం 1967లో భారతదేశ సార్వభౌమత్వం, సమగ్రతకు భంగం కలిగించే శక్తులను, ఉగ్రవాద చర్యలను అణచివేయడానికి తీసుకువచ్చారు. ఈ చట్టం కింద అరెస్ట్ అయినవారికి బెయిల్ పొందడం చాలా కష్టం. కుల, మత ఘర్షణలు సృష్టించాలని కుట్ర చేసినట్లు నిరూపణ అయితే పది సంవత్సరాలకు మించి శిక్ష పడవచ్చని, కొన్ని సందర్భాల్లో జీవితశిక్ష కూడా ఉంటుందని ముప్పాల సుబ్బారావు వివరించారు.