ఉదయ కృష్ణారెడ్డి కేసు: 14 మంది పోలీసులకు నోటీసులు కోరుతూ పిటిషన్

లైంగిక వేధింపుల ఆరోపణలు ఎదుర్కొంటున్న ట్రైనీ IPS అధికారి ఉదయ కృష్ణా రెడ్డి కేసులో కీలక పరిణామం చోటుచేసుకుంది. ఆయన తరఫు న్యాయవాదులు 14 మంది పోలీసులకు నోటీసులు జారీ చేయాలని రాజేంద్రనగర్ మెజిస్ట్రేట్ కోర్టులో పిటిషన్ దాఖలు చేశారు.

ఒక మహిళా IPS అధికారి ఫిర్యాదుతో అత్తాపూర్ పోలీస్ స్టేషన్లో ఈ కేసు నమోదైంది. ఉదయ కృష్ణా రెడ్డి రెండు రోజుల పాటు పోలీస్ కస్టడీలో ఉన్నారు. ఈ సందర్భంగా హైదరాబాద్ పోలీస్ కమిషనర్ సజ్జనార్ స్వయంగా విచారణలో పాల్గొన్నారు. కస్టడీ ముగిసిన తర్వాత ఆయనను కోర్టులో హాజరుపరిచారు.

కోర్టులో ఉదయ కృష్ణా రెడ్డి మాట్లాడుతూ, తనను బలవంతంగా సమాధానాలు చెప్పించేందుకు ప్రయత్నించారని, అవసరమైతే ఎన్కౌంటర్ చేస్తామని కూడా బెదిరించారని ఆరోపించారు. ఈ ఆరోపణలపై కోర్టు అత్తాపూర్ SHO, CI లకు నోటీసులు జారీ చేసి వివరణ కోరింది.

ఈ నేపథ్యంలో, ఇవాళ ఉదయ కృష్ణా రెడ్డి న్యాయవాదులు మరో పిటిషన్ దాఖలు చేసి, దర్యాప్తు సందర్భంగా తమపై వేధింపులకు పాల్పడ్డారని ఆరోపిస్తూ 14 మంది పోలీసులకు నోటీసులు ఇవ్వాలని కోరారు. ఈ పిటిషన్‌పై మధ్యాహ్నం 3:30 తర్వాత విచారణ జరగనుంది.

ఇదే సమయంలో, పోలీసులు ఉదయ కృష్ణా రెడ్డిని మరో రెండు రోజుల పాటు కస్టడీకి ఇవ్వాలని కోరుతూ పిటిషన్ వేశారు. ఈ రెండు పిటిషన్లపై ఇవాళ కోర్టు తీర్పు వెలువరించనుంది.