వడపల్లి బ్రహ్మోత్సవాలు: ఐదో రోజు విశేష పూజలు, హోమాలు నిర్వహణ

వడపల్లి శ్రీ భూసమేత శ్రీ వెంకటేశ్వర స్వామి ఆలయంలో 14వ వార్షిక బ్రహ్మోత్సవాలు జరుగుతున్నాయి. ఐదో రోజు పూజా కార్యక్రమాలను ఆలయ అర్చకులు శాస్త్రోక్తంగా నిర్వహించారు.

ఆశ్వయుజ బహుళ అష్టమి తిథి సందర్భంగా స్వామివారు గరుడ వాహనంపై భక్తులకు దర్శనమిచ్చారు. ఉదయం విశ్వక్సేన పూజ, పుణ్యాహవచనం, పంచామృత మండప ఆరాధన, మహాస్నపనం జరిగాయి. ప్రధాన హోమాలతో పాటు దుష్టగ్రహ పరిహారార్థం మహా సుదర్శన హోమం నిర్వహించారు.

అనంతరం తోమాల సేవ, నీరాజనం, మంత్రపుష్పాలు స్వామివారికి సమర్పించారు. సాయంత్రం స్వస్తివాచనం, ప్రధాన హోమాలు, స్వామివారికి విశేషార్చన జరిగాయి. చతుర్వేద స్వస్తి, దిగ్దేవతా బలిహరణ తదితర ధార్మిక కార్యక్రమాలు కూడా జరిగాయి.