విశాఖ: చేపల వేట సీజన్ ప్రారంభం, గంగమ్మకు పూజలు చేసి సముద్రంలోకి బోట్లు

విశాఖపట్నం తీరంలో చేపల వేట సీజన్ ప్రారంభమైంది. ఏప్రిల్ 17 నుంచి జూన్ 13 వరకు అమల్లో ఉన్న 60 రోజుల చేపల వేట నిషేదం ముగిసింది. దీంతో మత్యకారులు మళ్ళీ సముద్రంలోకి వెళ్లేందుకు సిద్ధమయ్యారు.

ఈ సీజన్ ప్రారంభానికి ముందు విశాఖ ఫిషింగ్ హార్బర్ లోని గంగమ్మ తల్లి ఆలయంలో మత్యకారులు ప్రత్యేక పూజలు నిర్వహించారు. మత్యకార కుటుంబాల మహిళలు సముద్ర తీరానికి వెళ్లి గంగమ్మకు పసుపు, కుంకుమ, నైవేద్యం సమర్పించారు. 'గంగమ్మ చల్లంగా చూడమ్మా' అంటూ ప్రార్థించి, కోటి ఆశలతో బోట్లు సముద్రంలోకి బయలుదేరాయి.

విశాఖ ఫిషింగ్ హార్బర్ నుంచి సుమారు 700 మెకనైజ్డ్ బోట్లు, 1000 ఇంజన్ బోట్లు చేపల వేటకు వెళ్తాయి. ఈ సీజన్ లో చేపల పుష్కలం గురించి సానుకూల సూచనలు వచ్చాయి. ఫిషరీస్ సైంటిస్ట్ డాక్టర్ జీవీఏ ప్రసాద్ మాట్లాడుతూ, విశాఖ నుంచి శ్రీకాకుళం జిల్లా భవనపాడు వరకు తీరంలో సర్వే నిర్వహించామని, ఆ ప్రాంతాల్లో పెద్ద మొత్తంలో చేపల లభ్యత కనిపించిందని తెలిపారు. పెళ్లిపొడి, బొక్కపొడి, ఎర్రనామాలు, నామాలు గులివిందలు, కారలు, బాడిమట్టలు వంటి వివిధ రకాల చేపలు లభ్యమవుతాయని వెల్లడించారు. ముఖ్యంగా ఋషికొండ, చింతపల్లి, భీమునిపట్నం, బావనపాడు ప్రాంతాల్లో మత్య సంపద ఎక్కువగా ఉన్నట్లు గుర్తించామన్నారు.

అయితే, మత్యకారులు కొన్ని సమస్యలు ఎదుర్కొంటున్నారు. డీజిల్ ధర గతంలో రూ.80 ఉండగా ప్రస్తుతం రూ.104కి పెరిగిందని, ఐస్ ధరలు కూడా పెరిగాయని వారు ఆవేదన వ్యక్తం చేస్తున్నారు. ప్రభుత్వం డీజిల్ సబ్సిడీని పెంచాలని మత్యకార సంఘాలు డిమాండ్ చేస్తున్నాయి. ఒక మత్యకారుడు మాట్లాడుతూ, 'ఇంత దూరం వెళ్లి వస్తే చమురు ఖర్చు భారంగా ఉంది. 800 బోట్లు ఉండగా, వీటిలో 400 బోట్లు కూడా వేటకు వెళ్లడం కష్టమని' అన్నారు. మరో మత్యకారుడు, 'గతంలో చాలా ఇబ్బంది పడ్డాం, ఈ సంవత్సరం గంగమ్మ తల్లి చల్లగా చూస్తుందని ఆశిస్తున్నాం' అని చెప్పారు.

తొలి రోజు అమావాస్య కావడంతో కొంతమంది మత్యకారులు పరిమితంగా వేట ప్రారంభించగా, మరికొందరు మంచి రోజు చూసుకుని సముద్రంలోకి వెళ్తామని చెప్పారు. మొత్తంగా, ఆశలతో కొత్త సీజన్‌లోకి అడుగుపెట్టిన మత్యకారులు గంగమ్మ కరుణతో చేపలు పుష్కలంగా లభిస్తాయనే నమ్మకంతో ఉన్నారు.