ఢిల్లీ వర్షాలు: దేవ్లీలో గోడ కూలి 10 కార్లు ధ్వంసం

ఢిల్లీలోని దేవ్లీ ప్రాంతంలో భారీ వర్షాల కారణంగా ఓ ప్రహరీ గోడ కుప్పకూలింది. ఈ ఘటనలో పక్కనే పార్కింగ్ చేసిన 10 కార్లు పూర్తిగా ధ్వంసమయ్యాయి. కార్లన్నీ నుజ్జు నుజ్జయి, వాహనదారులకు భారీ ఆస్తి నష్టం జరిగింది.

వరుసగా రెండో రోజు కూడా ఢిల్లీలో భారీ వర్షం కురుస్తోంది. ఇవాళ ఉదయం నుంచి వర్షపాతం అధికంగా నమోదు కావడంతో, భారత వాతావరణ శాఖ (IMD) రెడ్ అలర్ట్ ప్రకటించింది. వర్షాల ధాటికి తొమ్మిది ఇళ్లు కూలిపోయాయి. 16 ప్రాంతాల్లో చెట్లు విరిగిపడ్డాయి. ఒక ఇంటిపై చెట్టు కూలడంతో లోపల చిక్కుకున్న ముగ్గురు మహిళలను అగ్నిమాపక సిబ్బంది రక్షించారు.

రాజధానిలో పలు చోట్ల రోడ్లపై నీరు నిలిచిపోవడంతో ట్రాఫిక్ ఇబ్బందులు తలెత్తాయి. లోతట్టు ప్రాంతాల ప్రజలను అప్రమత్తం చేస్తూ, సురక్షిత ప్రాంతాలకు తరలి వెళ్లాలని అధికారులు సూచించారు. మరో 2-3 రోజులు ఇదే పరిస్థితి కొనసాగే అవకాశం ఉందని వాతావరణ శాఖ తెలిపింది.

గత సంవత్సరం వర్షాల ప్రభావాన్ని దృష్టిలో ఉంచుకొని ఢిల్లీ ప్రభుత్వం ఇప్పటికే పలు చర్యలు తీసుకుంది. అయినా, వర్షం వల్ల ప్రతిసారి లోతట్టు ప్రాంతాలు మునుగుతున్నాయని స్థానికులు చెబుతున్నారు. ప్రస్తుతం కూడా రెడ్ అలర్ట్ కొనసాగుతుండగా, ప్రజలు అప్రమత్తంగా ఉండాలని అధికారులు విజ్ఞప్తి చేశారు.