కృష్ణాపట్నం పోర్టు వద్ద వాటర్ మాఫియా ఆగడాలు: అధికారుల ఆకస్మిక తనిఖీ

నెల్లూరు జిల్లా ముత్తుకూరు మండలం కృష్ణాపట్నం పోర్టు పరిసరాల్లో అక్రమంగా భూగర్భ జలాలను తోడి విక్రయిస్తున్న వాటర్ మాఫియాపై భూగర్భ జలశాఖ అధికారులు శనివారం ఆకస్మిక తనిఖీలు నిర్వహించారు.

ఈ మాఫియా రోజుకు 50 నుంచి 70 ట్యాంకర్ల నీటిని బోర్ల ద్వారా తోడి, పోర్టు పారిశ్రామిక అవసరాలు, అంతర్జాతీయ నౌకలకు సరఫరా చేస్తున్నట్లు సమాచారం. బోర్ నీటిని కేవలం రూ.800 లకు కొనుగోలు చేసి, పోర్టు అవసరాలకు రూ.2,000 వరకు విక్రయిస్తూ భారీ లాభాలు గడిస్తున్నారు.

ఈ విచ్చలవిడి తోడ్పాటుతో ముత్తుకూరు, చుట్టుపక్కల గ్రామాల్లో భూగర్భ జలమట్టం 30 అడుగుల మేర పడిపోయింది. బోర్లలో ఉప్పు నీరు రావడంతో తాగునీటికి, పంటలకు తీవ్ర ఇబ్బందులు ఏర్పడ్డాయి. పచ్చని పొలాలు బీడు భూములుగా మారిపోయాయి. దీంతో గ్రామస్తులు, రైతులు ఉన్నతాధికారులకు ఫిర్యాదు చేశారు.

జిల్లా భూగర్భ జలశాఖ అసిస్టెంట్ డైరెక్టర్ పెరుమాళ్ళ శెట్టి, తహసీల్దార్ స్వప్న, విద్యుత్ శాఖ ఏఈ అక్బర్‌లతో కలిసి తనిఖీ చేపట్టారు. అనుమతులు లేకుండా వాణిజ్య అవసరాలకు నీటిని తరలిస్తున్న బోర్ పాయింట్లను గుర్తించారు. అక్రమ బోర్లకు విద్యుత్ కనెక్షన్లపై కూడా విచారణ జరిపారు.

తనిఖీల అనంతరం అధికారులు మాట్లాడుతూ, నిబంధనలు ఉల్లంఘించిన వారిపై కఠిన చర్యలు తీసుకుంటామని, పూర్తి స్థాయి నివేదికను ప్రభుత్వానికి సమర్పిస్తామని తెలిపారు. ఈ చర్యలతో నీటి దోపిడీకి అడ్డుకట్ట పడుతుందా లేదా అన్నది చూడాల్సి ఉంది.