వరిలో సమగ్ర కలుపు, ఎరువుల యాజమాన్యం: రైతులకు శాస్త్రవేత్త సూచనలు

ఖరీఫ్ సీజన్లో వరినాట్లు 40% పూర్తయ్యాయి. సమగ్ర కలుపు, ఎరువుల యాజమాన్యం పాటిస్తే అధిక దిగుబడులు సాధించవచ్చని సీనియర్ శాస్త్రవేత్త డాక్టర్ డి. చిన్నమ్మ నాయుడు సూచించారు.

ఆరుతడి పొలాల్లో కలుపు సమస్య ఎక్కువగా ఉంటుంది. నాటు వేసిన 20-25 రోజుల తర్వాత 100 మి.లీ. బిస్పైరిబాక్ సోడియం మందును 200 లీటర్ల నీటిలో కలిపి పిచికారి చేస్తే గడ్డి, కూర జాతి కలుపులు నివారించవచ్చు. డ్రమ్ సీడర్ విధానంలో విత్తిన వెంటనే 2-3 రోజులకు పైరిజో సల్ఫరాన్ ఇథైల్ (సాతి) 80 గ్రాములు 180-200 లీటర్ల నీటిలో కలిపి పిచికారి చేయాలి. లేదా ఆక్జాడయార్జిల్ (టాప్ స్టార్) 35 గ్రాములను ఇసుకలో కలిపి చల్లాలి. నాటు వేసే పొలాల్లో ఊడ్చిన 2-5 రోజుల్లో టాప్ స్టార్ 35-50 గ్రాములు ఇసుకతో కలిపి 1-2 అంగుళాల నీటి మట్టం ఉంచి చల్లితే మొదటి దశలో కలుపు అదుపవుతుంది.

ఎరువుల యాజమాన్యం భూసార పరీక్షల ఆధారంగానే చేయాలి. జింక్ లోపం ఉంటే చివరి దమ్ములో 20 కేజీల జింక్ సల్ఫేట్ వేయాలి. ఎకరాకు ఒక బస్తా డీఏపీ, 5-10 కేజీల యూరియా, 15-20 కేజీల పొటాష్ చివరి దమ్ములో వేయాలి. 20-25 రోజుల తర్వాత నీమ్ కోటెడ్ యూరియా భూసార పరీక్ష సిఫార్సు ప్రకారం వేయాలి. నత్రజని తక్కువైతే 25% పెంచి, ఎక్కువైతే 25% తగ్గించాలి.

సరైన కలుపు, ఎరువుల యాజమాన్యం వల్ల పంట ఆరోగ్యంగా పెరిగి దిగుబడి పెరుగుతుంది. సాగు ఖర్చు తగ్గి చీడపీడల ఉధృతి కూడా తగ్గుతుందని డాక్టర్ చిన్నమ్మ నాయుడు వివరించారు.