USA: న్యూజర్సీలోని భారతీయ నగల దుకాణంలో స్మాష్-అండ్-గ్రాబ్ దోపిడీ, 9.5 కోట్ల ఆభరణాలు అపహరణ

USA లోని న్యూజర్సీ రాష్ట్రంలోని Woodbridge లో ఒక భారతీయ నగల దుకాణంలో శుక్రవారం నలుగురు దుండగులు స్మాష్-అండ్-గ్రాబ్ దోపిడీకి పాల్పడ్డారు. కేవలం 30-45 సెకన్ల వ్యవధిలోనే దుకాణం నుండి 9.5 కోట్ల విలువైన ఆభరణాలు ఎత్తుకెళ్లారు.

పోలీసులు తెలిపిన వివరాల ప్రకారం, నల్లటి దుస్తులు, ముసుగులు ధరించిన నలుగురు వ్యక్తులు స్థానిక 9 Lakh Jewelers అనే దుకాణంలోకి ప్రవేశించారు. వారు తమ వెంట తెచ్చుకున్న పెద్ద సుత్తులతో షోకేసుల అద్దాలు పగలగొట్టి, లోపల ఉన్న ఆభరణాల ట్రేలను ప్లాస్టిక్ సంచుల్లో నింపుకున్నారు. దోపిడీ పూర్తి చేసుకున్న వెంటనే బయట సిద్ధంగా ఉంచిన కారులో పారిపోయారు.

ఈ మొత్తం ఘటన దుకాణంలోని CCTV కెమెరాల్లో స్పష్టంగా రికార్డైంది. గతంలో కూడా అదే వీధిలోని Virani Jewelers పై ఇటువంటి దాడి జరిగినట్లు స్థానికులు గుర్తు చేశారు. ఈ వరుస ఘటనలపై భారతీయ నగల వ్యాపారులు తీవ్ర ఆందోళన వ్యక్తం చేస్తున్నారు.

దుకాణాల యజమానులు పోలీసులు నేరం జరిగిన తర్వాత స్పందించడం కాకుండా ముందస్తు నివారణ చర్యలు చేపట్టాలని డిమాండ్ చేస్తున్నారు. ఈ ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు.