NEET PG కౌన్సిలింగ్‌లో సున్నా మార్కులకు ఆర్థోపెడిక్ సీటు? తెలంగాణలో తక్కువ మార్కులకు సీట్ల కేటాయింపు

నీట్ పీజీ 2025-26 కౌన్సిలింగ్ లిస్ట్ ప్రకారం, తెలంగాణలోని కామినేని హాస్పిటల్ మెడికల్ కాలేజీలో ఆర్థోపెడిక్ డిపార్ట్మెంట్‌లో సున్నా మార్కులు వచ్చిన అభ్యర్థికి సీటు కేటాయించారు. ఈ లిస్ట్ సోషల్ మీడియాలో వైరల్‌గా మారింది.

12 మార్కులతో ఉస్మానియా మెడికల్ కాలేజీలో ఎండి ఫోరెన్సిక్, 24 మార్కులతో ఎండి పాథాలజీ సీట్లు దక్కాయి. వరంగల్ మెడికల్ కాలేజీలో 32 మార్కులకు పాథాలజీ, గాంధీ మెడికల్ కాలేజీలో 59 మార్కులతో ఎండి పాథాలజీ, 74 మార్కులతో ఫార్మకాలజీ, 91 మార్కులతో ఆర్థోపెడిక్ డిపార్ట్మెంట్‌ల సీట్లు లభించాయి. ఇవి రోగుల ప్రాణాలకు సంబంధించిన కీలక విభాగాలు.

గతంలో నీట్‌లో ర్యాంకు పొందితేనే సీట్లు దొరికేవి. ఇప్పుడు రిజర్వేషన్ కేటగిరీల్లో సీట్లు భర్తీ చేయడంపై దృష్టి పెట్టడంతో చాలా తక్కువ మార్కులకు కూడా సీట్లు కేటాయించినట్లు తెలుస్తోంది. ఇలాంటి పరిస్థితి ఇతర రాష్ట్రాల్లోనూ కనిపిస్తోందని నివేదికలు చెబుతున్నాయి.

ఈ లిస్ట్ బయటపడిన తర్వాత వైద్య విద్య నాణ్యత, రోగుల భద్రతపై విమర్శలు వ్యక్తమవుతున్నాయి. ఈ విషయంపై రాష్ట్ర ప్రభుత్వం, సంబంధిత అధికారుల స్పందన లభ్యం కాలేదు.