తెల్లాపూర్ ZPHS లో రికార్డు అడ్మిషన్లు: ప్రైవేట్ స్కూళ్ళను వదిలి ప్రభుత్వ పాఠశాల వైపు తల్లిదండ్రులు

హైదరాబాద్ లోని తెల్లాపూర్ జిల్లా పరిషత్ హై స్కూల్ ఇప్పుడు అన్ని వర్గాల తల్లిదండ్రుల దృష్టిని ఆకర్షిస్తోంది. గత మూడు సంవత్సరాలుగా SSC పరీక్షలలో 100% ఫలితాలు సాధిస్తున్న ఈ ప్రభుత్వ పాఠశాలలో అడ్మిషన్ కోసం పెద్ద సంఖ్యలో తల్లిదండ్రులు క్యూ కడుతున్నారు.

లోకల్ విద్యార్థులకు మాత్రమే కాకుండా ఇందిరానగర్, JP నగర్, ఉస్మాన్ నగర్ వంటి దూర ప్రాంతాల నుండి కూడా తల్లిదండ్రులు తమ పిల్లలకు ఇక్కడ అడ్మిషన్ కోసం వస్తున్నారు. ప్రస్తుతం పాఠశాలలో 600 కంటే ఎక్కువ విద్యార్థులు చదువుతున్నారు. ఈ సంఖ్య 650 నుండి 700 వరకు పెరిగే అవకాశం ఉందని హెడ్ మాస్టర్ తెలిపారు.

నాన్ లోకల్ విద్యార్థులకు అడ్మిషన్ ఇవ్వడానికి ప్రత్యేక స్క్రీనింగ్ పరీక్ష నిర్వహిస్తున్నారు. పాఠశాల సామర్థ్యానికి మించి అడ్మిషన్లు ఇవ్వలేరని, అందువల్ల ఈ ప్రక్రియ తప్పనిసరి అయిందని అధికారులు వివరించారు.

గత సంవత్సరం 500 కంటే ఎక్కువ మార్కులు 80 మందికి పైగా విద్యార్థులకు వచ్చాయి. TALLENT పరీక్షలో తొమ్మిది మంది విద్యార్థులు ఎంపికయ్యారు. రాష్ట్ర ప్రభుత్వం నుండి బెస్ట్ ఎక్సలెన్స్ అవార్డు, PMC అవార్డు పాఠశాలకు లభించాయి. హెడ్ మాస్టర్ కు స్టేట్ బెస్ట్ టీచర్ అవార్డు కూడా వచ్చింది. మండల్ స్థాయిలో గత సంవత్సరం టాపర్ గా, ఈ సంవత్సరం సెకండ్ గా నిలిచింది.

ప్రత్యేక బోధన విధానంలో భాగంగా 10వ తరగతి విద్యార్థులకు మే జూన్ నెలల్లోనే స్పెషల్ క్లాసులు ప్రారంభిస్తారు. వెనకబడిన విద్యార్థులకు అదనపు శ్రద్ధ చూపిస్తారు. చదువుతో పాటు సాంస్కృతిక కార్యక్రమాలు, క్రీడలలో కూడా పాల్గొనేలా ప్రోత్సహిస్తారు. ప్రతి విద్యార్థి నైపుణ్యాలు గుర్తించి వాటిని అభివృద్ధి చేస్తారు.

ప్రైవేట్ పాఠశాలల నుండి పిల్లలను తీసుకువచ్చిన తల్లిదండ్రులు ఇక్కడి నాణ్యమైన విద్య గురించి అభినందిస్తున్నారు. లింగంపల్లి లోని ప్రైవేట్ స్కూలు మానిపించి తెల్లాపూర్ ZPHS లో చేర్పించిన ఒక తల్లి ఫీజు భారం తగ్గడంతో పాటు నాణ్యమైన విద్య అందుతుందని సంతోషం వ్యక్తం చేశారు. అడ్మిషన్ పొందిన విద్యార్థులు కూడా ఉపాధ్యాయుల ప్రోత్సాహం, పాఠశాల వసతులు అద్భుతంగా ఉన్నాయని చెప్పారు.