3I ATLAS: మన సూర్యుడి కంటే పురాతనమైన 12 బిలియన్ సంవత్సరాల ఇంటర్‌స్టెల్లార్ తోక చుక్క సౌరమండలంలోకి ప్రవేశించింది

3I ATLAS కేవలం ఒక సాధారణ తోక చుక్క కాదు. ఇది ఒక ఇంటర్‌స్టెల్లార్ కామెట్, అంటే మన సూర్యుడి గురుత్వాకర్షణ పరిధికి అవతల సుదూర విశ్వాంతరాళంలో పుట్టి ప్రయాణిస్తూ మన వైపుకు వచ్చిన వస్తువు. ఇలాంటి ఇంటర్‌స్టెల్లార్ వస్తువు మనకు కనిపించడం ఇది కేవలం మూడోసారి మాత్రమే. అందుకే దీనికి 3I అని పేరు పెట్టారు.

NASA కు చెందిన జేమ్స్ వెబ్ స్పేస్ టెలిస్కోప్ ఈ తోక చుక్కను నిశితంగా పరిశీలించి దాని వెనక దాగున్న కొన్ని అద్భుతమైన నిజాలను బయటపెట్టింది. జేమ్స్ వెబ్ టెలిస్కోప్ పంపిన తాజా డేటా ప్రకారం ఈ 3I ATLAS వయసు అక్షరాలా 10 నుండి 12 బిలియన్ సంవత్సరాలు.

మన సూర్యుడి వయసు కేవలం 4.5 బిలియన్ సంవత్సరాలు మాత్రమే. అంటే మన సూర్యుడు మరియు భూమి అసలు రూపంలోనే లేని సమయంలో, విశ్వంలో నక్షత్రాల పుట్టుక విపరీతంగా జరుగుతున్న కాస్మిక్ యుగంలోనే ఈ తోక చుక్క రూపుదిద్దుకుంది. ఈ ఆవిష్కరణ విశ్వం యొక్క పురాతన చరిత్రను అర్థం చేసుకోవడానికి శాస్త్రవేత్తలకు విలువైన అవకాశాన్ని అందిస్తోంది.