ల్యాండ్ సర్వే డిప్యూటీ డైరెక్టర్ నరహరి అరెస్టు; రూ.200 కోట్ల ఆస్తులు గుర్తించిన ఏసీబీ

ఆదాయానికి మించిన ఆస్తులు కేసులో ల్యాండ్ అండ్ సర్వే డిప్యూటీ డైరెక్టర్ నరహరిని అవినీతి నిరోధక శాఖ (ఏసీబీ) అధికారులు అరెస్టు చేశారు.

హైదరాబాద్‌లోని పలు ప్రాంతాల్లో నిర్వహించిన సోదాల్లో నరహరి నివాసం నుంచి ₹1.54 కోట్ల నగదును అధికారులు స్వాధీనం చేసుకున్నారు. బ్యాంకు ఖాతాల్లో ₹2.29 కోట్ల నిల్వలు, ₹5 కోట్ల ఫిక్స్డ్ డిపాజిట్లు గుర్తించారు. 1.3 కిలోల బంగారం, 8 కిలోల వెండి వస్తువులను కూడా సీజ్ చేశారు.

ఇది కాకుండా రంగారెడ్డి జిల్లాలో ఐదు ఓపెన్ ప్లాట్లు, మహేశ్వరంలో వ్యవసాయ భూమి, ఉప్పల్‌గూడాలో ఓ హైరైజ్ భవనం, నార్సింగిలో రెండు హైరైజ్‌లు, రాజేంద్రనగర్‌లో ఒక భవనం, గచ్చిబౌలిలో జీ+1 భవనం, చత్రినాకలో జీ+2 భవనం సహా 11 స్థలాల్లో అధికారులు ఆస్తి వివరాలు సేకరించారు.

డీఎస్పీ గంగసాని శ్రీధర్ నేతృత్వంలో ఏసీబీ బృందాలు ఈ సోదాలు నిర్వహించాయి. నరహరి బంధువులు, సన్నిహితుల ఇళ్లల్లో కూడా దాడులు జరిపాయి. సర్వీస్ కాలంలో అక్రమంగా ఆదాయం సమకూర్చుకున్న ఆరోపణలపై ఈ చర్యలు తీసుకున్నట్లు ఏసీబీ తెలిపింది.

ప్రస్తుతం నరహరి ఏసీబీ అదుపులో ఉన్నారు. కేసు దర్యాప్తు కొనసాగుతుందని, మరిన్ని ఆస్తులు బయటపడే అవకాశం ఉందని అధికారులు పేర్కొన్నారు. మొత్తం ఆస్తుల విలువ సుమారు ₹200 కోట్ల వరకు ఉండొచ్చని ఏసీబీ వర్గాలు అంచనా వేస్తున్నాయి.