అరుణాచల్‌లో వరదలు: ముగ్గురు గల్లంతు, 18 ఇళ్లు దెబ్బతిన్నాయి

అరుణాచల్ ప్రదేశ్‌లోని కీ పన్యూర్ జిల్లాలో భారీ వర్షాల కారణంగా మెరుపు వరదలు సంభవించాయి. నిర్మాణంలో ఉన్న రక్షణ గోడ కూలిపోవడంతో వరద నీరు నీప్కో ప్రాజెక్ట్ కాలనీలోకి ప్రవేశించడంతో ముగ్గురు గల్లంతయ్యారు. 18కు పైగా ఇళ్లు దెబ్బతిన్నాయని అధికారులు వెల్లడించారు.

ఘటనా స్థలానికి ఎస్డీఆర్‌ఎఫ్ బృందాన్ని పంపించగా, ఎన్డీఆర్‌ఎఫ్ బృందాలు సైతం సహాయక చర్యలకు బయలుదేరాయి. అరుణాచల్ ప్రభుత్వం రక్షణ చర్యల పర్యవేక్షణకు అధికారుల బృందాన్ని పంపింది. స్థానికంగా అందుబాటులో ఉన్న సిబ్బంది, మాజీ సైనికుల సాయంతో అత్యవసర కార్యకలాపాలు నిర్వహిస్తున్నారు.

గత కొన్ని రోజులుగా అరుణాచల్ ప్రదేశ్‌లో కురిసిన భారీ వర్షాలకు పలు జిల్లాల్లో మౌలిక సదుపాయాలు దెబ్బతిన్నాయి. లోతట్టు ప్రాంతాలు, నదీ తీరాల ప్రజలు అప్రమత్తంగా ఉండాలని, అనవసర ప్రయాణాలు మానుకోవాలని విపత్తు నిర్వహణ అధికారులు విజ్ఞప్తి చేశారు.