అయోధ్య రామాలయం విరాళాల చోరీ: SIT విచారణ వేగంగా; 6 మంది పూజారులను ప్రశ్నించారు

అయోధ్య రామాలయం విరాళాల చోరీ కేసులో ప్రత్యేక దర్యాప్తు బృందం (SIT) విచారణ ఆరో రోజుకు చేరుకుంది. ఆరుగురు పూజారులను, ఆరుగురు బ్యాంకు ఉద్యోగులను SIT అధికారులు విచారించారు. రాముడి పాదుకలు, హారంతో పాటు 60 కేజీల వెండి శిలలు మాయమైనట్లు గుర్తించారు.

విరాళాల లెక్కింపు సీసీటీవీ ఫుటేజీని తొలగించినట్లు తెలిసింది. సుమారు 200 కోట్ల రూపాయల విరాళాలు మాయమైనట్లు అనుమానిస్తున్నారు. విరాళాల రసీదులు లభ్యం కాకపోవడంతో అనుమానాలు మరింత బలపడుతున్నాయి.

ఆలయ ట్రస్ట్‌లో విరాళాల లెక్కింపు బాధ్యత చూస్తున్న టిన్ను యాదవ్‌ను పోలీసులు అరెస్టు చేసే అవకాశం ఉంది. అయితే తన భర్తకు ఈ చోరీతో సంబంధం లేదని టిన్ను యాదవ్ భార్య పూనమ్ స్పష్టం చేశారు.

ఆలయంలో మొత్తం 800 మంది ఉద్యోగులు ఉండగా, 200 మంది ట్రస్ట్ బాధ్యతలు నిర్వర్తిస్తున్నారు. ట్రస్ట్‌లో కీలక సంస్కరణలు చేపట్టాలని ఉత్తరప్రదేశ్ ప్రభుత్వం నిర్ణయించింది. ట్రస్ట్ ఛైర్మన్‌గా సీనియర్ ఐఏఎస్ అధికారిని నియమించే అవకాశం ఉంది. సీసీటీవీ ఫుటేజ్ మాయంపై ఫారెన్సిక్ ఆడిట్‌కు ఆదేశించే యోచనలో అధికారులు ఉన్నారు.

కేసు విచారణ పురోగతిని వివరించడానికి SIT బృందం ఆదివారం లక్నో చేరుకుని, సీఎం యోగి ఆదిత్యనాథ్‌ను కలవనుంది. ఈ కేసులో ఇప్పటికీ ఎఫ్ఐఆర్ నమోదు కాలేదు.