భద్రాద్రి ఆలయ పునర్నిర్మాణం ప్రారంభం, శ్రీరామనవమి నాటికి పూర్తి చేసే లక్ష్యం

భద్రాద్రి శ్రీ సీతారామచంద్రస్వామి ఆలయ పునర్నిర్మాణ పనులు శనివారం ప్రారంభమయ్యాయి. ఈ కార్యక్రమంలో కలెక్టర్ అంకిత్, ఎమ్మెల్యే తెల్లం వెంకట్రావ్, ఆలయ ఈఓ దామోదర్ రావు పాల్గొని పూజలు చేశారు. ముందుగా హరినాథ్ బాబా ఆలయం కింద గోడను తొలగించే పనికి శ్రీకారం చుట్టారు.

ఈ ఏడాది మార్చిలో ముఖ్యమంత్రి రేవంత్ రెడ్డి భద్రాద్రిలో 351 కోట్ల రూపాయల ఆలయ అభివృద్ధి, గోదావరి పుష్కరాల పనులకు శంకుస్థాపనలు చేశారు. వీటిలో మొదటి విడతగా ఆలయ అభివృద్ధికి 200.89 కోట్ల నిధులు కేటాయించారు. ఈ నిధులతో చుట్టూ ఉన్న పాత ప్రాకారాలను తొలగించి విశాలమైన ప్రాంగణాలు నిర్మిస్తారు.

ప్రధాన ఆలయం, ఆంజనేయ స్వామి ఆలయం, లక్ష్మీ తాయారు అమ్మవారి ఆలయం తదితరాలను పునర్నిర్మిస్తారు. ఆలయ పరిసరాల్లోని పలు నిర్మాణాలను కూల్చివేసి, వేలాది మంది భక్తులు ఒకేసారి దర్శించుకునేలా విశాలంగా తీర్చిదిద్దుతారు. నిర్మాణ సమయంలో భక్తుల దర్శనాలకు ఎలాంటి అంతరాయం లేకుండా యథావిధిగా కొనసాగిస్తామని అధికారులు తెలిపారు.

వచ్చే శ్రీరామనవమి (సీతారాముల కళ్యాణం) నాటికి పునర్నిర్మాణం పూర్తి చేయాలని లక్ష్యంగా పెట్టుకున్నారు. అలాగే, 75 కోట్ల రూపాయలతో గోదావరి పుష్కరాలకు రహదారులు, ఘాట్ల అభివృద్ధి పనులు కూడా చేపడుతున్నారు.