అమరావతి రాజధానిని కొనసాగిస్తామని సీఎం చంద్రబాబు స్పష్టీకరణ

ఆంధ్రప్రదేశ్ ముఖ్యమంత్రి చంద్రబాబు నాయుడు అమరావతిని రాష్ట్ర ఏకైక రాజధానిగా కొనసాగిస్తామని స్పష్టం చేశారు. ఒక కార్యక్రమంలో ఆయన మాట్లాడుతూ, గత ప్రభుత్వం ప్రతిపాదించిన మూడు రాజధానుల ప్రణాళికను తాము తిరస్కరించామని, అమరావతిని రాజధానిగా నిలబెట్టేందుకు కేంద్రం సహకారం అందించిందని తెలిపారు.

రాష్ట్రంలో రెండేళ్ల క్రితం ఉన్న పరిస్థితుల నుంచి గణనీయమైన పురోగతి సాధించామని, 93 కేంద్ర పథకాలను పునరుద్ధరించామని చంద్రబాబు చెప్పారు. జల్జీవన్ మిషన్ ద్వారా ఇంటింటికి నీటి సరఫరా అందించేందుకు రూ.28 వేల కోట్లతో పనులు ప్రారంభించినట్లు తెలిపారు.

పోలవరం ప్రాజెక్టు పనులకు కేంద్రం నిధులు ఇచ్చిందని, వచ్చే ఏడాది గోదావరి పుష్కరాల నాటికి దీనిని పూర్తి చేసి జాతికి అంకితమిస్తామని ప్రకటించారు. విశాఖపట్నం స్టీల్ ప్లాంటును కేంద్ర సహాయంతో నిలబెట్టామని, విశాఖకు ప్రత్యేక రైల్వే జోన్ సాధించామని పేర్కొన్నారు. ఉత్తరాంధ్రలో గూగుల్ డేటా సెంటర్ రాబోతోందని, పుట్టపర్తిలో ఫిఫ్త్ జనరేషన్ ఫైటర్ జెట్ తయారీ కూడా జరుగుతుందని తెలిపారు.

రాయలసీమను పారిశ్రామికంగా అభివృద్ధి చేస్తామని, ఇరిగేషన్, లాజిస్టిక్స్, గ్రీన్ ఎనర్జీ, ఎలక్ట్రానిక్ రంగాల్లో యువతను అగ్రస్థానంలో నిలిపే బాధ్యత తీసుకుంటామని చంద్రబాబు నాయుడు హామీ ఇచ్చారు. ఈ ప్రసంగంలో ఆయన ప్రధానమంత్రి నరేంద్ర మోడీకి, ఉపముఖ్యమంత్రి పవన్ కళ్యాణ్‌కు సహకారానికి కృతజ్ఞతలు తెలిపారు.