నెల్లూరు పర్యటనలో సీఎం చంద్రబాబు నాయుడు సంక్షేమ, అభివృద్ధి ప్రకటనలు

ఆంధ్రప్రదేశ్ ముఖ్యమంత్రి చంద్రబాబు నాయుడు నెల్లూరు జిల్లా పర్యటన సందర్భంగా పలు సంక్షేమ, అభివృద్ధి ప్రకటనలు చేశారు. మహిళల కోసం దీపం పథకం కింద మూడు ఉచిత గ్యాస్ సిలిండర్లు, ఉచిత బస్సు ప్రయాణం వంటి పథకాలను గుర్తు చేశారు. భవిష్యత్తులో ప్రభుత్వం కొనుగోలు చేసే అన్ని ఆర్టీసీ బస్సులు ఏసీ బస్సులే అవుతాయని తెలిపారు. దివ్యాంగులు, మత్యకారులు, ఆటో డ్రైవర్లు, చేనేత కార్మికులకు ఇచ్చే ఉచిత కరెంట్ తదితర పథకాలను ప్రస్తావించారు.

పేదరిక నిర్మూలన లక్ష్యంగా ‘పీ4’ (మార్గదర్శి-బంగారు కుటుంబం) కార్యక్రమం అమలవుతోందని చెప్పారు. 12 లక్షల బంగారు కుటుంబాలు, లక్ష మంది మార్గదర్శులు కలిసి పనిచేస్తున్నారని, ఉపాధి, విద్య, నైపుణ్య శిక్షణ, సొంతిల్లు, వ్యాపార అవకాశాలు కల్పించడం ద్వారా పేదల జీవన ప్రమాణాలు పెంచడమే లక్ష్యమన్నారు. ‘ఒక కుటుంబం-ఒక పారిశ్రామికవేత్త’ కార్యక్రమాన్ని కూడా ప్రస్తావించారు.

డీడబ్ల్యూసీఆర్ఏ సమూహాల గురించి మాట్లాడుతూ, వీరి రుణ వసూళ్ల రేటు 99.7%గా ఉందని, స్వయం ఉపాధి రుణాల అమల్లో దేశానికి ఆదర్శంగా నిలిచాయని కేంద్ర ప్రభుత్వ విశ్లేషణలో తేలిందని తెలిపారు. ఈ సమూహాల సభ్యులు డబ్బులు తీసుకున్న తర్వాత బ్యాంకులకు తిరిగి చెల్లించిన తర్వాతే మళ్ళీ తీసుకుంటారని, ఇది వారి నీతి నిజాయితీకి నిదర్శనమని అన్నారు.

నెల్లూరు జిల్లా అభివృద్ధిపై దృష్టి సారించారు. కృష్ణపట్నం పోర్ట్ తర్వాత రామాయంపట్నం పోర్ట్, దుగ్గరాజపట్నంలో నౌకా నిర్మాణ కేంద్రం రాబోతున్నాయని చెప్పారు. రామాయంపట్నంలో బీపీసీఎల్ సంస్థ లక్ష కోట్ల పెట్టుబడితో చమురు శుద్ధి కర్మాగారం, క్రిస్ ఇండస్ట్రియల్ నోడ్లో రూ.10,000 కోట్ల పెట్టుబడులు, ఉదయగిరిలో రక్షణ మందుగుండు క్లస్టర్, ఇఫ్కో కిసాన్ సెజ్ వంటి భారీ ప్రాజెక్టులు వస్తున్నాయని వివరించారు. గూడూరు, చిల్లకూరు, కోట, ముత్తుకూరు ప్రాంతాల్లో 27 భారీ పరిశ్రమలు వచ్చాయని, గూడూరులో మెగా ఫర్నిచర్ పార్క్ కోసం వెయ్యి ఎకరాల్లో రూ.3,500 కోట్లతో 10 వేల మందికి ఉపాధి లభిస్తుందని చెప్పారు. దేశంలోకి వచ్చిన మొత్తం పెట్టుబడుల్లో 25.5% ఆంధ్రప్రదేశ్‌కే రావడం ప్రభుత్వ విధానాలపై నమ్మకాన్ని తెలియజేస్తోందన్నారు.

సాగునీటి ప్రాజెక్టుల విషయంలో, రాష్ట్రంలో 36 ప్రాజెక్టుల కోసం ఇప్పటికే రూ.24,000 కోట్లు ఖర్చు చేశామని చెప్పారు. వెలుగొండ ప్రాజెక్టు నిర్మాణంపై మాట్లాడుతూ, గత ప్రభుత్వం రూ.4,000 కోట్లు ఖర్చు చేసినా పూర్తికాలేదని విమర్శించారు. తాము పునరావాసానికి రూ.900 కోట్లు కేటాయించగా, ఇప్పటికే రూ.300 కోట్లు విడుదల చేశామని, త్వరలో మరో రూ.600 కోట్లు ఇస్తామని ప్రకటించారు. ఫేజ్-1, ఫేజ్-2 పూర్తి చేస్తామని, పెన్నా సర్వేపల్లి రిజర్వాయర్ ఈ ఏడాది డిసెంబర్ కల్లా పూర్తవుతుందని తెలిపారు.