చైనాకు ఎగుమతి చేసిన 3 గుంటూరు మిర్చి కంటైనర్లు వెనక్కి: కారణం పురుగు మందు అవశేషాలు

చైనాకు ఎగుమతి చేసిన మూడు గుంటూరు మిర్చి కంటైనర్లను అక్కడి అధికారులు వెనక్కి పంపించారు. మిర్చిలో అనుమతించిన పరిమితికి మించి పురుగుల మందుల అవశేషాలు ఉన్నట్లు గుర్తించడంతో ఈ చర్య తీసుకున్నారు. ప్రత్యేకంగా 'మిటామిడో పాస్' అనే పురుగు మందు అవశేషాలు అధిక స్థాయిలో ఉన్నట్లు తేలింది.

గుంటూరు మిర్చి యార్డ్ నుంచి ఏటా 20 వేలకు పైగా కంటైనర్లలో మిర్చి చైనాకు ఎగుమతి అవుతుంది. చైనా కీలక మార్కెట్ కావడంతో ఈ పరిణామం ఎగుమతిదారుల్లో ఆందోళన కలిగించింది. గత నెలలో ఎగుమతి చేసిన ఈ మూడు కంటైనర్లను చైనా కస్టమ్స్ అధికారులు తనిఖీ చేసి నిషేధించారు.

ఈ ఘటనపై వ్యాపారులు ప్రభుత్వానికి నివేదించారు. మిర్చిలో అవశేషాలు వదిలే పురుగు మందులపై పూర్తి నిషేధం విధించాలని, రైతులకు సురక్షిత ప్రత్యామ్నాయాలపై అవగాహన కల్పించాలని వారు డిమాండ్ చేస్తున్నారు. ఎగుమతి ప్రమాణాలకు అనుగుణంగా పంట ఉత్పత్తి చేసేలా ప్రత్యేక చర్యలు తీసుకోవాలని కోరుతున్నారు.

ఇటీవలి కాలంలో థాయిలాండ్, శ్రీలంక, అమెరికా, ఐరోపా వంటి దేశాలు కూడా పురుగు మందుల అవశేషాల కారణంగా భారత మిర్చి ఎగుమతులను తిరస్కరించాయి. నాణ్యతా ప్రమాణాలు కఠినతరం చేయడంతో మిర్చి ఎగుమతులపై ప్రభావం పడుతోంది. రైతులు పురుగు మందుల వాడకం తగ్గించి ప్రపంచ నాణ్యతా ప్రమాణాలు పాటించాలని ఎగుమతిదారులు సూచిస్తున్నారు.