మహిళా నేత లైంగిక వేధింపుల ఆరోపణలపై కాంగ్రెస్ నుంచి శివకుమార్ రెడ్డి సస్పెన్షన్

కాంగ్రెస్ పార్టీ తెలంగాణ నేత కుంభం శివకుమార్ రెడ్డిని సస్పెండ్ చేసింది. పార్టీలోని ఓ మహిళా నాయకురాలు తనపై లైంగిక వేధింపులకు పాల్పడ్డారని చేసిన ఆరోపణల నేపథ్యంలో ఈ చర్య తీసుకున్నారు. తెలంగాణ కాంగ్రెస్ ఇంచార్జ్ మీనాక్షి నటరాజన్ ఈ నిర్ణయాన్ని అధికారికంగా ప్రకటించారు.

బాధితురాలు మొదట పార్టీ అధిష్టానానికి ఫిర్యాదు చేయగా, తన ఫిర్యాదును పట్టించుకోలేదని నాంపల్లి కోర్టును ఆశ్రయించారు. కోర్టు సూచనల మేరకు ప్రజా ప్రతినిధుల కోర్టులోనూ పిటిషన్ దాఖలు చేశారు. ఈ కేసులో శివకుమార్ రెడ్డితో పాటు మీనాక్షి నటరాజన్, పీసీసీ చీఫ్ మహేష్ కుమార్ గౌడ్, మంత్రి వాకటి శ్రీహరి పేర్లు కూడా ప్రస్తావనకు వచ్చాయి.

సస్పెన్షన్ తర్వాత ఇప్పుడు బాధితురాలు మరో అంశంపై దృష్టి పెట్టారు. తన ఫిర్యాదు వివరాలు, వ్యక్తిగత సమాచారం బయటికి రావడంపై ఆమె ఆగ్రహం వ్యక్తం చేస్తున్నట్లు సమాచారం. బాధ్యులపై పరువు నష్టం దావా వేసే అవకాశం ఉందని కాంగ్రెస్ వర్గాలు చెబుతున్నాయి.

ఈ కేసు కోర్టులో కొనసాగుతోంది. విచారణలో మరిన్ని వివరాలు వెలుగులోకి వస్తాయా అన్నది ప్రస్తుతం ఆసక్తికరంగా మారింది. కాంగ్రెస్ అగ్రనేతలపై ఈ వివాదం ఎలాంటి రాజకీయ ప్రభావం చూపుతుందనే చర్చ జరుగుతోంది.