స్టెరాయిడ్స్ వాడకంపై యువతకు వైద్యుల హెచ్చరిక: దీర్ఘకాలంలో ప్రాణాలకే ప్రమాదం

యువతలో బాడీబిల్డింగ్ పట్ల ఆసక్తి పెరుగుతోంది. త్వరగా కండలు పెంచుకోవడానికి స్టెరాయిడ్స్ వినియోగిస్తున్నారని, ఇది ప్రాణాంతకమని వైద్యులు హెచ్చరిస్తున్నారు.

ఔషధ నియంత్రణ అధికారుల తనిఖీల్లో కొన్ని జిమ్లలో అనబోలిక్ స్టెరాయిడ్స్, మెఫెన్‌టర్మిన్ సల్ఫేట్ ఇంజెక్షన్లు స్వాధీనం చేసుకున్నారు. వైద్యుల పర్యవేక్షణ లేకుండా ఈ ఇంజెక్షన్లు వాడితే రక్తపోటు విపరీతంగా పెరిగి కార్డియాక్ అరెస్ట్, బ్రెయిన్ స్ట్రోక్ ప్రమాదం ఉందని నిపుణులు హెచ్చరిస్తున్నారు.

న్యూరో సర్జన్ డాక్టర్ ఉదయ్ గౌతం మాట్లాడుతూ, స్టెరాయిడ్స్ వల్ల కాలేయం, మూత్రపిండాలు దెబ్బతింటాయని, గుండె కండరాలు మందంగా మారి బీపీ హెచ్చుతగ్గులు వస్తాయని తెలిపారు. యువకుల్లో సహజంగా టెస్టోస్టిరాన్ ఉత్పత్తి ఉంటుంది కాబట్టి స్టెరాయిడ్స్ అవసరం లేదని, ఎక్కువగా వాడితే సంతానలేమి, నపుంసకత్వం, ఆందోళన, డిప్రెషన్ వంటి మానసిక సమస్యలు వస్తాయని హెచ్చరించారు.

జిమ్‌లో వ్యాయామం చేసే ప్రతి ఒక్కరికీ ప్రోటీన్ పౌడర్ అవసరం లేదని, సహజ ఆహారం, క్రమశిక్షణతో కూడిన వ్యాయామమే సరిపోతుందని వైద్యులు సూచిస్తున్నారు. కండరాల పరిమాణం కంటే సంపూర్ణ ఆరోగ్యమే ముఖ్యమని గుర్తు చేశారు.