అత్తాపూర్ BBQ నేషన్‌పై ఆహార భద్రత అధికారుల దాడి; గడువు తీరిన మాంసం స్వాధీనం

అత్తాపూర్‌లోని BBQ నేషన్ రెస్టారెంట్‌పై ఆహార భద్రత అధికారులు దాడి చేశారు. రంగారెడ్డి జిల్లా రాజేంద్రనగర్ పరిధిలోని ఈ రెస్టారెంట్‌లో గడువు ముగిసిన చికెన్, మటన్, చేపలు, కేకులు స్వాధీనం చేసుకున్నారు. ఎక్స్‌పైరీ తేదీలు మార్చి కొత్త లేబుళ్లు ముద్రించి పాత మాంసాన్ని వాడుతున్నట్లు గుర్తించామని ఫుడ్ సేఫ్టీ అధికారి సౌమ్య తెలిపారు.

ప్రజల ప్రాణాలతో చెలగాటమాడే ఇలాంటి పద్ధతులను సహించబోమని ఆమె హెచ్చరించారు. రెస్టారెంట్‌పై గతంలోనూ దాడులు నిర్వహించినా యాజమాన్యంలో మార్పు రాలేదని అధికారులు పేర్కొన్నారు. ఈసారి స్వాధీనం చేసుకున్న ఆహార పదార్థాలను ధ్వంసం చేసి, చట్టపరమైన చర్యలు తీసుకుంటామని సౌమ్య వెల్లడించారు.

BBQ నేషన్‌పై వచ్చిన ఫిర్యాదు మేరకు జాయింట్ ఇన్స్పెక్షన్ నిర్వహించామని, మాంసం నిల్వలో ప్రామాణిక మార్గదర్శకాలు పాటించడం లేదని సౌమ్య వివరించారు. రెస్టారెంట్ లేబుళ్లు మార్చుతూ అదే మాంసాన్ని తిరిగి వాడడం గమనించామని ఆమె తెలిపారు.