పాదాలతో బ్రెడ్ తయారీ వీడియో వైరల్: అసలు వాస్తవం ఇదే

పాదాలతో బ్రెడ్ పిండిని కలుపుతున్న యువతి వీడియో సోషల్ మీడియాలో వైరల్ అవుతోంది.

ఈ వీడియోలో ఐస్లా అనే యువతి, తన రెండు పాదాలతో పిండిని తొక్కుతూ కలుపుతున్నట్లు కనిపిస్తుంది. ఆమె ఇది పురాతన సెల్టిక్ సంప్రదాయమని, పాదాల్లోని సహజ తేమ బ్రెడ్‌కు ప్రత్యేక రుచి ఇస్తుందని చెప్పింది. అంతేకాకుండా, ఆ రుచి కోసం తాను 10 రోజుల పాటు స్నానం చేయలేదని ఆమె తెలిపింది.

అయితే, ఈ వీడియో నిజమైన బేకరీ ఘటన కాదని తేలింది. బ్రిటన్‌లోని ఛానల్ 4 ప్రసారం చేసే 'ద ఐట' అనే వ్యంగ్య హాస్య కార్యక్రమం కోసం దీన్ని తీశారు. సమాజంలోని మూఢనమ్మకాలపై విమర్శగా రూపొందించిన ఈ కంటెంట్‌ను కొందరు సోషల్ మీడియాలో కట్ చేసి నిజమైనదిగా పోస్ట్ చేశారు.

దీంతో నెటిజన్లు తీవ్రంగా స్పందించారు. కొంతమంది అసహ్యం వ్యక్తం చేయగా, మరికొందరు సంప్రదాయమంటూ సమర్థించారు. ఇంటర్నెట్‌లో కనిపించే ప్రతి వీడియోను నిజానిజాలు తెలుసుకోకుండా నమ్మకూడదని ఈ సంఘటన చూపిస్తోంది.