జూన్ త్రైమాసికంలో బంగారం, వెండి ధరలు భారీ పతనం

జూన్ త్రైమాసికంలో బంగారం, వెండి ధరలు భారీగా పతనమయ్యాయి. గత దశాబ్దంలో తొలిసారి స్వర్ణ ధరలు ఇంత క్షీణించగా, గత నాలుగేళ్లలో తొలిసారిగా వెండి ధరల్లోనూ పెద్ద తగ్గుదల నమోదైంది.

ప్రస్తుత త్రైమాసికంలో ఇప్పటివరకు బంగారం 12%, వెండి 17.6% క్షీణించాయి. ఆల్ టైం గరిష్ట స్థాయి నుంచి గోల్డ్ 24% కరెక్షన్ కు గురికాగా, సిల్వర్ 47% పతనమైంది. పారిశ్రామిక డిమాండ్ తగ్గడం, అంతర్జాతీయ మార్కెట్ ఒత్తిళ్లతో వెండి రేటు దిగొచ్చింది.

డాలర్ విలువ బలోపేతం కావడం, ఫెడరల్ రిజర్వ్ వడ్డీ రేట్లు వరుసగా పెంచడం, ద్రవ్యోల్బణ నియంత్రణ చర్యలతో ఇన్వెస్టర్లు సురక్షితమైన బాండ్లు, డాలర్ వైపు మొగ్గు చూపారు. దీంతో విలువైన లోహాలపై పెట్టుబడులు తగ్గాయి. ప్రపంచ కేంద్ర బ్యాంకులు గత త్రైమాసికాల్లో బంగారాన్ని భారీగా నిల్వ చేసుకున్నప్పటికీ, ధరలు గరిష్ట స్థాయికి చేరడంతో ఇటీవల కొనుగోలు వేగం తగ్గించాయి.

అంతర్జాతీయ మార్కెట్ ప్రభావం భారతదేశంలోనూ కనిపించింది. గ్లోబల్ మార్కెట్లో బంగారం 12% తగ్గినప్పటికీ, రూపాయి బలహీనత కారణంగా దేశీయ మార్కెట్లలో ఈ తగ్గుదల 5 నుంచి 7% పరిధిలోనే నమోదైందని నిపుణులు చెబుతున్నారు.