తిరుపతిలో అమ్మమ్మ ఇంట్లోనే చోరీ: మనవరాలితో సహా ముగ్గురు అరెస్ట్

తిరుపతి రూరల్ పరిధిలోని చెర్లోపల్లి వెంకటపతి నగర్లో టీటీడీ ఉద్యోగిని కే.ఆర్. యశోదమ్మ నివసిస్తున్నారు. ఈ వృద్ధురాలు తన మనవరాలు పూజారి సోనియాను నమ్మి ఇంట్లో ఆశ్రయం ఇచ్చింది. యశోదమ్మ విధులకు వెళ్లిన సమయంలో సోనియా తన స్నేహితులతో కలిసి దొంగతనం చేసింది.

యశోదమ్మ ఇంటి తాళాలను వాషింగ్ మెషిన్లో దాచిపెట్టింది. ఈ విషయం తెలిసిన సోనియా, నంద్యాల బాబు, అనిత అనే ముగ్గురు కలిసి పథకం వేశారు. యశోదమ్మ ఇంట్లో లేని సమయంలో వాషింగ్ మెషిన్లో ఉన్న తాళాలతో ఇల్లు తెరిచి, బీరువాలో ఉన్న ఇనుప లాకర్ను ఎత్తుకెళ్లారు.

లాకర్లో 600 గ్రాముల బంగారం, 1.5 కిలోల వెండి, రూ.50,000 నగదు ఉన్నాయి. వీటి విలువ సుమారు రూ.93 లక్షలు. బాధితురాలు ఫిర్యాదు చేయడంతో తిరుపతి పోలీసులు 24 గంటల్లోనే కేసును చేధించారు. ముగ్గురు నిందితులను అరెస్టు చేసి, దొంగిలించిన నగలు, నగదును స్వాధీనం చేసుకున్నారు. పోలీసులు విచారణ కొనసాగిస్తున్నారు.