హైదరాబాద్‌లో NEET రీ-ఎగ్జామ్‌లో మొబైల్ వాడి కాపీ చేస్తూ విద్యార్థి అరెస్ట్

హైదరాబాద్‌లోని రాగన్నగూడ జిల్లా పరిషత్ ఉన్నత పాఠశాలలో నీట్ రీ-ఎగ్జామ్ పరీక్ష సందర్భంగా మాల్‌ప్రాక్టీస్‌కు పాల్పడిన 18 ఏళ్ల విద్యార్థిని పోలీసులు అరెస్టు చేశారు. అచ్చంపేటకు చెందిన నాగరాజు అనే విద్యార్థి ఈ నేరానికి పాల్పడినట్లు పోలీస్ ప్రెస్‌నోట్ ద్వారా వెల్లడైంది.

నాగరాజు ఉదయం 7 గంటల ప్రాంతంలో పాఠశాల వద్దకు చేరుకుని, తన మొబైల్ ఫోన్‌ను వాష్‌రూమ్ వెంటిలేటర్ వద్ద దాచాడు. పరీక్ష రాస్తున్న సమయంలో కడుపు నొప్పిగా ఉందని చెప్పి, వాష్‌రూమ్‌కు వెళ్లేందుకు ఇన్విజిలేటర్ల అనుమతి పొందాడు. వాష్‌రూమ్‌లో ఎక్కువసేపు గడపడంతో అనుమానం వచ్చిన ఇన్విజిలేటర్లు సిబ్బందిని పంపారు.

సిబ్బంది వెళ్లి చూడగా, నాగరాజు అక్కడే దాచిన మొబైల్ ఉపయోగించి Google Chrome లో సమాధానాలు వెతుకుతూ కనిపించాడు. వెంటనే పోలీసులకు సమాచారం ఇవ్వడంతో, ఆదిబట్ల పోలీసులు సంఘటనా స్థలానికి చేరుకుని విద్యార్థిని అదుపులోకి తీసుకున్నారు. అతను వాడిన మొబైల్ ఫోన్‌ను స్వాధీనం చేసుకున్నారు. విచారణలో నాగరాజు తన నేరాన్ని అంగీకరించాడు.

పోలీసులు అతనిపై బీఎన్ఎస్ సెక్షన్ 318, పబ్లిక్ ఎగ్జామినేషన్ (ప్రివెన్షన్ ఆఫ్ అన్‌ఫెయిర్ మీన్స్) యాక్ట్ 2024 లోని సెక్షన్ 10 ప్రకారం కేసు నమోదు చేశారు. క్రైమ్ నెంబర్ 499/2026 కేటాయించారు. అనంతరం నిందితుడిని రిమాండ్‌కు తరలించినట్లు పోలీస్ ప్రెస్‌నోట్‌లో పేర్కొన్నారు. హైదరాబాద్ పోలీసులు నీట్ రీ-ఎగ్జామ్ సందర్భంగా మాల్‌ప్రాక్టీస్ జరిగిన ప్రాంతాల వివరాలతో కూడిన ప్రెస్‌నోట్ విడుదల చేశారు.