భారత తొలి హైడ్రోజన్ రైలు ట్రయల్స్ తుది దశలో; 10-12 రోజుల్లో ఫైనల్ పరీక్షలు

భారతదేశపు తొలి హైడ్రోజన్ ఇంధనంతో నడిచే రైలు ట్రయల్స్ తుది దశకు చేరుకున్నాయి. ప్రస్తుతం కొనసాగుతున్న పరీక్షల్లో సాంకేతిక లోపాలు, కమ్యూనికేషన్ వ్యవస్థ ఇబ్బందులు వంటి అనేక అంశాలపై దృష్టి పెట్టారు. ఇప్పటి వరకు ట్రయల్స్ ఎలాంటి సమస్యలు లేకుండా సాఫీగా సాగుతున్నాయని రైల్వే అధికారులు తెలిపారు.

మరో 10 నుంచి 12 రోజుల్లో ఫైనల్ పరీక్షలు పూర్తవుతాయని ఆశిస్తున్నట్లు అధికారులు వెల్లడించారు. అన్ని పరీక్షలు ముగిసిన తర్వాత నివేదికలను రీసెర్చ్ డిజైన్ అండ్ స్టాండర్డ్స్ ఆర్గనైజేషన్ (ఆర్డిఎస్ఓ)కు పంపనున్నారు. ఆర్డిఎస్ఓ తుది అనుమతి ఇచ్చిన వెంటనే సాధారణ ప్రయాణికులకు ఈ రైలు అందుబాటులోకి వస్తుంది.

ఢిల్లీ డివిజన్ డివిజనల్ రైల్వే మేనేజర్ పుష్పేష్ త్రిపాఠి ఇటీవల జింద్ జంక్షన్ స్టేషన్, హైడ్రోజన్ ప్లాంట్, హెలిపాడ్ లను పరిశీలించారు. రైలు ప్రారంభానికి ముందస్తు ఏర్పాట్లు సకాలంలో పూర్తి చేయాలని అధికారులకు సూచించారు.

సోనిపట్-జింద్ రైల్వే మార్గంలో 120 కిలోమీటర్ల వేగంతో స్పీడ్ ట్రయల్ విజయవంతంగా నిర్వహించామని డీఆర్ఎం త్రిపాఠి తెలిపారు. ఢిల్లీ-సోనిపట్-జింద్-ఢిల్లీ మార్గాల్లో నిరంతర తనిఖీలు కొనసాగుతున్నాయి. 2027-28 మధ్యలో రైలు ప్రారంభించే యోచన ఉన్నట్లు సమాచారం.

హైడ్రోజన్ రైలు డీజిల్ ఇంజిన్లకు ప్రత్యామ్నాయంగా నిలుస్తుంది. కార్బన్ ఉద్గారాలను గణనీయంగా తగ్గించి స్వచ్ఛమైన ఇంధన వినియోగానికి ఇది దోహదపడుతుందని రైల్వే వర్గాలు చెబుతున్నాయి. ఆర్డిఎస్ఓ ఆమోదం తర్వాతే ఈ రైలు ప్రారంభ తేదీ ఖరారవుతుంది.