దేశీయ స్టాక్ మార్కెట్లలో రెండో రోజూ ర్యాలీ; ఇన్వెస్టర్ల సంపద రూ.5 లక్షల కోట్లకు పైగా రికవరీ

దేశీయ స్టాక్ మార్కెట్లు రెండో రోజు కూడా భారీ లాభాల్లో ట్రేడవుతున్నాయి. ఉదయం ట్రేడింగ్ మొదలైన 27 నిమిషాల్లోనే ఇన్వెస్టర్ల సంపద ₹2.82 లక్షల కోట్లు పెరిగింది. గడిచిన రెండు రోజుల్లో ఇన్వెస్టర్ల సంపద ₹5 లక్షల కోట్లకు పైగా పుంజుకుంది.

నిఫ్టీ 24,500 దిశగా కదులుతోందని, 12 వారాల రేంజ్‌ను బ్రేక్ అవుట్ చేసిందని స్టాక్ మార్కెట్ విశ్లేషకుడు ప్రభు తెలిపారు. US-ఇరాన్ మధ్య అణు ఒప్పందంపై పురోగతి ఉంటుందనే అంచనాలు, బ్రెంట్ క్రూడ్ ధర బ్యారెల్‌కు $70.79కి దిగిరావడం ఈ ర్యాలీకి కారణాలుగా ఆయన పేర్కొన్నారు.

ఐటీ రంగం షేర్లు బలమైన రీబౌండ్ ఇచ్చాయి. నిన్న 3% పతనమైన ఇన్ఫోసిస్, టీసీఎస్, హెచ్‌సీఎల్ టెక్ షేర్లు ఈరోజు 3% పెరిగాయి. ఎన్టీపీసీ, బజాజ్ ఫైనాన్స్, ఎల్అండ్టీ షేర్లు నష్టాల్లో ఉన్నాయి.

గోల్డ్ ధరలు స్వల్పంగా పెరిగాయి; 10 గ్రాముల పసిడి ₹3000 వరకు లాభపడింది. వెండి ₹5000 పెరిగింది. అయితే, దిగుమతి సుంకం 9% తగ్గించే అవకాశం ఉన్నందున స్వల్పకాలంలో బంగారం మరింత తగ్గొచ్చని ప్రభు అంచనా వేశారు. క్రూడ్ ఆయిల్ ధరలు $60-61 వరకు దిగివచ్చే అవకాశం ఉందని ఆయన తెలిపారు.

ఫెడరల్ రిజర్వ్ డిసెంబర్ లోపల వడ్డీ రేట్లు పెంచే అవకాశం ఉందని, అది స్వల్పకాలికంగా బంగారాన్ని ఒత్తిడి చేయవచ్చని ప్రభు వివరించారు. అయితే, దీర్ఘకాలిక పెట్టుబడిదారులు భయపడాల్సిన అవసరం లేదని, స్మాల్‌, మిడ్‌ క్యాప్‌లు 52 వారాల గరిష్ఠాలను దాటుతున్నందున ఇంకా పెరిగే ఊపు ఉందని, కరెక్షన్లను కొనుగోలు అవకాశంగా భావించాలని సూచించారు. దీర్ఘకాలంలో ఏఐ అమలు చేసే ఐటీ కంపెనీలు మంచి రిటర్న్లివ్వగలవని ఆయన చెప్పారు.