కేతన్ అగర్వాల్ హత్య కేసులో నిందితుల క్రికెట్ లింక్, 2,004 ఫోన్ కాల్స్ వెల్లడి

కేతన్ అగర్వాల్ హత్య కేసులో నిందితులు సియా గోయల్, చేతన్ చాద్రిల మధ్య క్రికెట్ కనెక్షన్ దర్యాప్తు సంస్థలకు కీలక ఆధారంగా మారింది. సియా సోదరుడు సాహిల్ గోయల్, చేతన్ చాద్రి కలిసి మార్కెట్ ఫ్రెండ్స్ క్రికెట్ లీగ్‌లో ఒకే జట్టు తరఫున ఆడేవారు. ఈ మ్యాచ్‌లకు సియా తన సోదరుడికి మద్దతుగా వచ్చేది. అక్కడే సియా, చేతన్‌లు తొలిసారి కలిశారని పోలీసులు గుర్తించారు.

దీపావళి 2025 సందర్భంగా ఓ స్నేహితుడి పార్టీలో సియా, చేతన్ మళ్లీ కలిశారు. అప్పటి నుంచి వీరిద్దరి మధ్య తరచూ సంప్రదింపులు మొదలయ్యాయి. జనవరి 2026 నుంచి జూన్ 2026 మధ్య కాలంలో వీరిద్దరూ 2,004 సార్లు ఫోన్‌లో మాట్లాడుకున్నారు. ఈ కాల్స్ మొత్తం వ్యవధి 238 గంటలు అని పోలీసు రికార్డులు వెల్లడిస్తున్నాయి.

డిజిటల్ సాక్ష్యాలపై దర్యాప్తు బృందం దృష్టి పెట్టింది. సియా, చేతన్ ఇద్దరూ తమ WhatsApp చాట్లను డిలీట్ చేశారు. పోలీసుల నిఘా భయంతో Instagram యాక్టివిటీని కూడా తొలగించారు. ఫోన్‌లోని recycle bin ను కూడా క్లియర్ చేసినట్లు పోలీసులు అనుమానిస్తున్నారు. ప్రస్తుతం forensic బృందం డిలీట్ అయిన డేటాను రికవరీ చేసే ప్రయత్నంలో ఉంది.

హత్య జరిగిన రోజు చేతన్ తన అసలు ఫోన్‌ను షాపులోనే వదిలేశాడు. తన లొకేషన్ బయటపడకుండా ఉండేందుకు ఓ కార్మికుడి ఫోన్ తీసుకెళ్లాడు. దీంతో ఆ రోజు చేతన్‌కు కాల్ చేసిన వారెవరూ అతనితో మాట్లాడలేకపోయారు. ఇది పోలీసులకు కీలక ఆధారంగా మారింది.

హత్య జరగడానికి ఒక రోజు ముందు సియా, చేతన్ పుణేలోని ఓ కేఫ్‌లో సుమారు గంటసేపు కలిశారు. ఇదే వీరిద్దరి చివరి భేటీ అని పోలీసులు నిర్ధరించారు. కేఫ్ సీసీటీవీ ఫుటేజీని సైతం పోలీసులు స్వాధీనం చేసుకున్నారు.

సాహిల్‌కు సియా, చేతన్‌ల సంబంధం గురించి ముందే తెలుసని పోలీసు వర్గాలు ధ్రువీకరించాయి. అయితే తన వాంగ్మూలంలో సాహిల్ ఈ విషయం తనకు తెలియదని పేర్కొన్నాడు. సియా తల్లిదండ్రులు ప్రవీణ్ గోయల్, పూజా గోయల్ కూడా ఈ సంబంధం గురించి తమకు ఏమీ తెలియదని చెప్పారు. దర్యాప్తులో భాగంగా మరిన్ని మంది స్నేహితులు, బంధువులను ప్రశ్నించే అవకాశం ఉంది.