కేతన్ అగర్వాల్ హత్య కేసు: క్రికెట్ పరిచయం నుంచి హత్య కుట్ర – పోలీస్ కొత్త వివరాలు

కేతన్ అగర్వాల్ హత్య కేసులో పోలీసులు కొత్త కీలక వివరాలు వెలుగులోకి తీసుకొచ్చారు. నిందితుడు చేతన్ చౌదరికి సియా సోదరుడు సాహిల్ ద్వారా క్రికెట్ పరిచయం ఏర్పడిందని దర్యాప్తులో తేలింది. ఈ పరిచయమే స్నేహంగా మారి తర్వాత ప్రేమగా పరిణమించిందని పోలీసులు అనుమానిస్తున్నారు. సాహిల్‌ను 10 గంటల పాటు విచారించారు.

డిజిటల్ ఆధారాలపై దృష్టి పెట్టిన పోలీసులు, నిందితులు WhatsApp చాట్స్‌తో పాటు రీసైకిల్ బిన్ డేటాను డిలీట్ చేసినట్టు గుర్తించారు. దీంతో రెండు మొబైల్ ఫోన్లను ఫారెన్సిక్ ల్యాబ్‌కు పంపగా, డిలీటెడ్ డేటా రికవరీకి నిపుణులు రంగంలోకి దిగారు.

జూన్ 17న, హత్యకు ముందు రోజు నిందితులు, సియా పూణేలోని ఓ కేఫ్‌లో రహస్యంగా గంటసేపు గడిపారని పోలీసులు తేల్చారు. అప్పుడే హత్య ప్రణాళిక సిద్ధం చేశారనే అనుమానంతో సీసీటీవీ ఫుటేజీ, ఇతర డిజిటల్ ఆధారాలు పరిశీలిస్తున్నారు.

లోహగడ్ కోట వద్ద సియా కూర్చోవడం సిగ్నల్‌గా తీసుకున్న చేతన్, వెనుక నుంచి వచ్చి కేతన్‌ను లోయలోకి నెట్టాడని పోలీసులు తెలిపారు. అయితే చేతన్ తాను సంఘటనా స్థలంలో లేనని చెబుతుండగా, పోలీసులు అతన్ని అనుమానిస్తున్నారు. ఫారెన్సిక్ రిపోర్టు హత్య కుట్ర ఎంతకాలం నుంచి కొనసాగిందో తెలిపే అవకాశం ఉందని దర్యాప్తు అధికారులు భావిస్తున్నారు.