ఖరీఫ్ వరి నారుమడి యాజమాన్యం: రైతులకు డా. దామోదర్ రాజు సూచనలు

తెలుగు రాష్ట్రాల్లో ఖరీఫ్ సీజన్ కోసం వరి నారుమడులు పోసే పనులు ముమ్మరంగా సాగుతున్నాయి. ఈ నేపథ్యంలో రాజేంద్రనగర్ వరి పరిశోధన స్థానం ప్రధాన శాస్త్రవేత్త డాక్టర్ దామోదర్ రాజు ఆరోగ్యకరమైన నారు పెంచడానికి సూచనలు ఇచ్చారు.

విత్తనాల రేటు: అతి సన్న రకాలైన జై శ్రీరామ్, తెలంగాణ సోనా, హెచ్ఎంటీ లాంటి రకాలకు ఎకరానికి 15 కిలోల విత్తనం సరిపోతుంది. సన్న రకాలైన బిబిటీ లాంటి రకాలకు 20 కిలోలు. దొడ్డు రకాలైన 1000ప, కేఎన్ఎం 118 లాంటి రకాలకు 25 కిలోలు చాలు. ఒక ఎకరా సాగుకు సరిపడా నారు కోసం రెండు గుంటల విస్తీర్ణంలో నారుమడి వేయాలి.

నారుమడి తయారీలో వీలైనంత సేంద్రియ ఎరువులు వేయాలి. రసాయనిక ఎరువులు: ఒక ఎకరా సరిపడా నారుమడికి 4.5 కిలోల యూరియా (రెండు సార్లు), 2 కిలోల పొటాష్ (రెండు సార్లు), 1 కిలో డీఏపీ అడుగు మందుగా వేయాలి. నారు పచ్చబడే సమయంలో 2 కిలోల యూరియా, మళ్ళీ 10 రోజుల తర్వాత మరో 2 కిలోల యూరియా వేసుకోవాలి.

నారు వయసు: సాధారణంగా 25 నుంచి 30 రోజుల లోపు నాట్లు వేయాలి. వర్షాకాలంలో ఉష్ణోగ్రతలు అనుకూలంగా ఉండటంతో 15 రోజుల నుంచి 30 రోజుల లోపు నారు నాటవచ్చు. లేత నారు నాటడం వల్ల పిలకలు పెరిగి ఎక్కువ దిగుబడి వస్తుంది.

పురుగులు, కలుపు నివారణ: నారు పీకే వారం ముందు ఎకరా నారుమడికి 1 కిలో కార్బోఫ్యూరాన్ గుళికలు వేయాలి. జింకు లోపం ఉంటే 1 కిలో జింక్ సల్ఫేట్ వేయాలి. కలుపు రాకుండా బిస్పైరిబాక్ సోడియం 0.5 ml లీటరుకు, లేదా పెనాక్జలం 2 ml లీటరు నీటికి కలిపి స్ప్రే చేయాలి. ఈ సూచనలు పాటిస్తే మంచి నారుతో పాటు అధిక దిగుబడి పొందవచ్చు.