కొల్లేరులో అక్రమ చేపల చెరువుల కూల్చివేతలకు అటవీ శాఖకు సహకరించాలని కలెక్టర్‌కు కేంద్ర కమిటీ ఆదేశాలు

కొల్లేరు సరస్సు పరిధిలోని అక్రమ చేపల చెరువుల కూల్చివేతలకు అటవీ శాఖకు పూర్తి సహకారం అందించాలని ఏలూరు జిల్లా కలెక్టర్‌కు కేంద్ర సాధికార కమిటీ ఆదేశాలు జారీ చేసింది. స్థానిక యంత్రాంగం సహకరించడం లేదని, కూల్చివేతలకు అడ్డు తగులుతున్నట్లు అటవీ-పర్యావరణ శాఖ ఫిర్యాదు చేసిన నేపథ్యంలో ఈ ఆదేశాలు వచ్చాయి. తక్షణం రంగంలోకి దిగి చర్యలు తీసుకోవాలని కలెక్టర్‌ను ఆదేశించారు.

అక్రమ చెరువుల ఏర్పాటుపై, కొత్తగా నిర్మించిన గట్లపై ఆంధ్రప్రదేశ్ ప్రభుత్వాన్ని కమిటీ నివేదిక కోరింది. అక్రమ చెరువులకు విద్యుత్ కనెక్షన్లు ఇవ్వటంపై కమిటీ తీవ్ర అసంతృప్తి వ్యక్తం చేసింది. అటపాక పక్షుల సంరక్షణ కేంద్రానికి నీటి సరఫరా నిలిపివేయడాన్ని తప్పుపట్టింది. సరస్సులో కాలుష్యం పెరుగుతుండటంపై ఆందోళన వ్యక్తం చేసిన పిటిషనర్ వాదనలను పరిగణనలోకి తీసుకుంది.

కొల్లేరు లేక్ ప్రొటెక్షన్ కేసు విచారణలో భాగంగా ఈ ఆదేశాలు వెలువడ్డాయి. కూల్చివేతల పురోగతి, కాలుష్య నివారణ చర్యలపై నివేదిక సమర్పించాలని, కొల్లేరు కాలుష్యంపై ఆంధ్రప్రదేశ్ ప్రభుత్వం సమగ్ర సమాధానం ఇవ్వాలని కమిటీ స్పష్టం చేసింది. అటపాక పక్షుల కేంద్రం ఎండిపోతుండటంతో పక్షుల మనుగడ ప్రమాదంలో పడిందని పిటిషనర్ వాదించారు.