నూజువీడు: కాలువ పునరుద్ధరణ పనులు ప్రారంభించిన మంత్రి కొలుసు పార్థసారధి

నూజువీడు నియోజకవర్గం పల్లెర్లమూడి గ్రామంలో కాంతమ్మ చెరువు నుండి సప్లై ఛానల్ వరకు సాగునీటి కాలువ పునరుద్ధరణ పనులను రాష్ట్ర మంత్రి కొలుసు పార్థసారధి ప్రారంభించారు. ఈ పనులు జలధార జలహారతి 100 రోజుల కార్యక్రమంలో భాగంగా చేపట్టారు.

ఈ సందర్భంగా మంత్రి మాట్లాడుతూ, రైతులకు సాగునీరు అందించడమే లక్ష్యమని తెలిపారు. గతంలో చెరువులను అనుసంధానించే విధానం ఉండేదని, ప్రస్తుతం నిర్లక్ష్యం కారణంగా ఆ వ్యవస్థ దెబ్బతిన్నదని అన్నారు. ముఖ్యమంత్రి చంద్రబాబు నాయుడు రాష్ట్రవ్యాప్తంగా జలధార పేరిట 100 రోజుల కార్యక్రమం ప్రారంభించి, వేలాది చెరువుల పునరుద్ధరణ చేపట్టారని చెప్పారు.

ఇటీవల పోలవరంలో జరిగిన సమీక్షలో సీఎం, ప్రతి జిల్లా కలెక్టర్‌కు ఇలాంటి పనుల కోసం రూ.2 కోట్లు కేటాయించాలని ఆదేశించారని మంత్రి వివరించారు. ఇన్‌ఫ్లో ఛానళ్లు, కాలువల పునరుద్ధరణపై దృష్టి పెట్టాలని సూచించారని తెలిపారు.